नेसं ११४४ ञलाथ्व ३, येँ । खुसिया मापदण्डया सन्दर्भय् थीथी राजनैतिक पार्टीया नेतातय्सं सहलह ब्याकूगु दु । सर्वोच्च अदालतं खुसिया मापदण्ड उप्वयेकेगु फैसला याःगु व उकियात कार्यान्वयण यायेत येँ महानगरपालिकां सुचं जारी यायेधुंकाः स्थानीयवासी चिन्तित जूगुलिं थुकथंया सहलह ब्याकूगु खः ।
विषययात कयाः नेकपा एमाले काठमाडाै जिल्ला कमिटी सचिव राजेश शाक्य, नेपाली कांग्रेसका काठमाडाैं महानगर सभापति नीलकाजी शाक्य, नेपाल कम्युनिष्ट पार्टी माओबादी काठमाडाै जिल्ला अध्यक्ष सन्जय लामा, राप्रपा काठमाडाै जिल्ला अध्यक्ष प्रदिप बिष्ट ,नेकपा एसया एन. पि. श्रेष्ठ, जसपाया ज्ञानेन्द्र रत्न बज्राचार्य, नेमकिपाया नारायण महर्जन, हाम्रो नेपाल पार्टीया प्रदेश सभा सदस्य मा. शैलेन्द्र बज्राचार्य, नेपाल समाजवादी पार्टीया काठमाडौं संयोजक शम्भु लामा, नेपाल समाजबादी पार्टीया केन्द्रीय सदस्य अनुप सिं सुवालं थःथःगु बिचाः तयादीगु खः । ब्वति काःपिं राजनैतिककर्मि सकस्यां विषयगत कारणं ब्वलंगु समस्याया समाधान यायेत न्ह्यागुकथंया अभियानय् थःगु ऐक्यबद्वता दूगु बचं बियादीगु खः ।
ज्याझ्वः नेवाः देय् दबू काठमाडाैं जिल्ला समितिं ग्वसाः ग्वःगु खः । ज्याझ्वःया सभापतित्व धनबहादुर महर्जनं यानादीगु खः । ज्याझ्वलय् लसकुस ग्वसाः खलःया न्वकू श्रीजनमान श्रेष्ठं यानादीगु खः । ज्याझ्वः सुनिता महर्जनं न्ह्याकादीगु खः ।
