येँ, ११४४ कछलागा १३ । आर आर क्याम्पसय् कन्हय् निसें न्ह्याइगु स्नातक तगिंया न्हूगु भर्ना जूपिनि कक्षा तालिकाय् नेपालभाषा विषय मतल । थुगुसिया नेपालभाषा विषय कयाः ब्वनीपिनि ल्याः म्ह्वः जूगुलिं थथे कक्षा लिकाःगु धाःगु दु ।
क्याम्पस प्रशाशनं छुं हे जानकारी मब्युसे क्याम्पस प्रमुखया रोहबरं हे थथे नेपालभाषा कक्षा अध्यापन दिकूगु खः । क्याम्पस प्रशाशनयाके थथे नेपालभाषा लिकाःगुया हुनिं सिइकेत स्वापू तयाबलय् थुगुसी निम्ह जक विद्यार्थिं नेपालभाषा विषय कयाः भर्ना याःगुलिं न्हूगु सत्रय् नेपालभाषा कक्षा मतयागु धाःगु दु । भर्ना जूपिं न्याम्ह थ्यन कि कक्षा सञ्चालन यायेगु नं जानकारी ब्यूगु दु ।
न्हापा नं नेपालभाषा विषय अध्यापन जुयाच्वंसां विद्यार्थि मदुगु त्वहलय् दिकाछ्वःगु खः । न्यादँ न्ह्यव विद्यार्थिपिनिगु कुतलं हे थन नेपालभाषा विषय अध्यापन हाकनं न्ह्याःगु खः । आ: थन क्याम्पसय् स्नातक व स्नातकोत्तर तगिमय् नेपालभाषा विषय अध्यापन जुयाच्वंगु दु । थुगुसी न्हापांगु दँय् हे अध्यापन मजुलकि थुकिया लिच्वः स्नातकोत्तर तगिमय् तक लाइगु खँय् अन अध्यापन यानाच्वंपिं शिक्षकतय्सं च्यूताः प्वंकूगु दु ।
३ नम्वर प्रदेशय् प्रादेशिक भाषा ऐन पारित जुयाः कार्यान्वयण जुइत्यंगुलिं नेपालभाषा ब्वनातःपिं जनशक्तित आपालं ल्याखय् मालीगु अवस्थाय् भर्ना जूपिं विद्यार्थि मगाःगु कारण क्यनाः प्रशाशनं थथे अध्यापन दिकूगु अर्थपूर्ण तायेकातःगु दु ।