येँ । काैलागा १२ कुन्हु कवयित्री नारायणदेवी श्रेष्ठजुं च्वयादीगु म्येया म्युजिक भिडियोया पितब्वज्या जुल । कवयित्री श्रेष्ठया स्वक्वःगु ज्या–जंक्व(देवरथारोहण)या लसता ज्याझ्वलय् वय्कःया हे ‘प्रेम आश दुने बिलिबिलि जायेकाः’ म्ये नेपालभाषा व नेपाली निगू भाय्या म्युजिक भिडियोया पितब्वज्या वय्कलं हे यानादिल ।
कवयित्री श्रेष्ठया दकले न्हापां पिदंगु ‘मुखु स्वाँ’ नांया कविता सफुतिइ दुथ्याःगु पितब्वःगु उगु म्ये नां दंम्ह म्येहालामि रीता महर्जनं संगीतवद्ध यानाः सः बियादीगु खः । म्येया नेपाली अनुवाद गायक, संगीतकार एवं साहित्यकार योगेश वैद्यजुं यानादीगु खः । म्येया संगीत संयोजन जुगल डंगोलं यानादीगु खः । म्युजिक भिडियोया छायांकन, सम्पादन एवं निर्देशन राजेन्द्र डंगोलं यानादीगु खः । म्युजिक भिडियोसं न्हूम्ह कलाकार सुमिना महर्जनजुं नृत्य व अभिनय यानादीगु दु । अनु महर्जनं उगु प्याखं स्यनादीगु दु । प्याखनय् भेषभूषा शोभा महर्जनया व श्रृंगार उमिशा पाण्डेया खः ।
कवियत्रीया जंक्वया लसता भ्वजय् वय्कःयात उपहारकथं वय्कःया सन्तानपिं गणेराम श्रेष्ठ, मेरी पात्रवंश, दिनेशराम श्रेष्ठ, महेशराम श्रेष्ठ व नरेशराम श्रेष्ठं वय्कलं च्वयादीगु म्येया म्युजिक भिडियो नेपाली भाषं नं दयेकाः थः मांप्रति समर्पित याःगु खः ।