नेसं ११४५ चिल्लाथ्व ७, येँ । कामपा १४ वडां नं रत्न राज्यलक्ष्मी कलेजय् स्नातक तगिमय् नेपालभाषा विषय कयाः अध्ययनरत छम्ह विद्यार्थीयात छात्रवृति बिइगु जूगु दु । थुगु बचं उगु वडाया अध्यक्ष भाजु सुमन श्रेष्ठं बियादीगु खः । वडाअध्यक्ष श्रेष्ठं स्नातक तगिमय् नेपालभाषा ब्वनाच्वंपिं विद्यार्थीया लागिं मंकाःकथं छात्रवृति मुनेगु अभियान न्ह्याकाच्वंगु पुचःयात थुकथंया बचं बियादीगु खः ।
अभियानया नेतृत्व यानाच्वंम्ह मय्जु श्रीमिला सुवालया कथं आ:तक कामपा वडा नं १२ व १४ या वडाअध्यक्षपिं पाखें थुकथंया छात्रवृति बिइगु बचं वयेधुंकूगु व वडा नं २४ पाखें नं ज्या न्ह्याकाच्वंगु जानकारी बियादीगु दु । अभियानया संयोजन यानाच्वंगु संस्था ह्याउँनिभाःया अध्यक्ष राकेस मान मास्कें थुगु अभियानं नेपालभाषा विद्यार्थीपिन्त हःपाः चुलाइगु भलसा कयाः थःपिं न्ह्यज्यानाच्वनागु कनादीगु दु ।
अभियानय् रत्न राज्यलक्ष्मी कलेजय् नेपालभाषा अध्यापन यानाच्वंपिं अनुप सिं सुवाल, योगेन्द्र राज राजकर्णिकार व दिपना शर्मा राजोपाध्यायं ब्वति कयाच्वंगु दु । ह्याउँनिभाःया ग्वाहालिं थ्व मंकाःज्या न्ह्यानाच्वंगु खः ।