नेसं ११४५ कौलागा १४, सक्व । गोबिन्द सेतिमाया लुमन्ति दबुलिं स्नातकोत्तर तगिमय् नेपालभाषाया शोधार्थीयात वंगु कौलागा कुन्हु छात्रवृति इयुंगु दु । लिसें मेम्ह स्वम्हेसित नं छात्रवृति ब्यूगु दु । थन जूगु थुगु लुमन्ति दबूया ज्याझ्वलय् थुकथं छात्रवृति इयुंगु खः । थ्वसिबें न्ह्यव वंगु विहिवार कुन्हु सांखु अाधारभूत विद्यालयया ३५ म्ह विद्यार्थीयात पोशाक इयुंगु खः ।
दबुलिं स्नातकोत्त तगिमय् शोधपत्र च्वइम्हेसित दँय् नीन्याद्वः तकाया शोधवृति बीगु घोषणा यानातःगु दु । थुगुसी रत्नराज्य कलेजया शोधार्थी रितेश मल्लयात थुगु शोधवृति ब्युगु खः । सक्वय् SEE परिक्षाय् उत्कृष्ट लिच्वः हइपिं मिसा छम्ह मिजं छम्हेसित झिद्वः तका, सामुदायिक उच्च माध्यमिक तगिंया परिक्षाय् उत्कृष्ट लिच्वः हइपिं मिसा व मिजंयात म्हतिं नीद्वः तका बीगु घोषणा यानातःकथं उगु ज्याझ्वलय् छात्रवृति इयुंगु खः । ज्याझ्वलय् सक्वया छगू भजन खलः मध्य छगूयात दँय् झिंन्याद्वः तका इनेगु बचंकथं थुगुसी लप्सेफेदीया नारायण इश्वर भजन खलःयात ब्युगु खः ।
ज्याझ्वः दबूया अध्यक्ष माधव श्रेष्ठया सभापतित्वय् जूगु खः । ज्याझ्वलय् मूपाहाँकथं राजेन्द्र लिंगडेल लिसें सक्व नगरपालिकाया मेयर रमेश नापित व उपमेयर समिता श्रेष्ठं नवानादीगु खः । ज्याझ्वलय् सक्वया प्रतिष्ठित राजनैतिककःमि, समाजसेवसी, व्यवसायी, शिक्षक, पत्रकारपिंसं ब्वति काःगु खः ।
