येँ, थिंलागा ०३ । येँ देय्या झिंच्यागू मूल महाविहारय् बहा: पूजा या:गु दु । थुगु ज्याझ्व: श्रीखण्ड तरुमूल महाविहार, सिखंमूबहा:या ग्वसालय् जूगु ख: । चैत्र कृष्ण अष्टमी कुन्हु स्वयम्भूया शान्तिपुरय् न्यायेकीगु येँया ‘देय् आचार्य गुथि’इ दुथ्यानाच्वंगु झिंच्यागू महाविहारय् बहा: पूजा या:वनेगु उद्देश्य कथं थुगु ज्याझ्व:या ग्वसा: ग्व:गु ख: ।
मैत्रीपुर महाविहार, क्वाबहालय् मुना: न्ह्या:गु ज्याझ्व: झ्वाबहा: (रत्नचैत्य महाविहार), ध्वाकाबहा:, गंबहा:, न्हूबहा: (रत्नकेतु महाविहार), तछेबहा:, जनबहा:, तेबहा:, सबलबहा:, मूबहा:, इतुंबहा:, मखंबहा:, सिखंमूबहा:, ओँबहा:, मिखाबहा:, इकुबहा:, लगंबहा:, मुसुंबहा: (मणिसिंह महाविहार), मुसुंबहा: (मणिसंघ महाविहार) जुया: सिखंमूबहालय् वया: क्वचा:गु ख: । ज्याझ्वलय् निस: सिबें उप्व: श्रद्धालु उपासक – उपासिकापिन्सं ब्वति का:गु ख: ।
गुरुजु गौतम रत्न बज्राचार्यं विहार पतिकं क्वा:पा:द्य:या न्ह्य:ने पञ्चोपचार पूजा यानाबिज्या:गु ख: । राजगुरु मञ्जुश्री रत्न बज्राचार्यं विहार पतिकं बहा: पूजाया अन्त्यय् अर्घ वाक्य ब्वनाबिज्याना: कजि नवराज बज्राचार्ययात अर्घ बिइके ब्यूगु ख: । श्रीखण्ड तरुमूल महाविहार संरक्षण तथा संचालन समितिया छ्याञ्जे गौतममान शाक्यं सकल जगतसत्व प्राणीया उद्धार जुइमा धैगु कामना यासें थुगु बहा: पूजा यानागु खँ कनादिल ।