येँ, नेसं ११४४ कछलागा १० । थ्व हे वैगु थिंलाथ्व ४ कुन्हु येँय् संघीयता, गणतन्त्र, धर्म निरपेक्ष लगायतया पैरवी यायेत वृहद नेवाः ताम्सालिन सभा याइगु जूगु दु । पहिचानवादी नेवाः व तामांग समुदाय जानाः थ्व सभा यायेत्यंगु खः ।
थौं नेवाः देय् दबूया ग्वसालय् जूगु नेवाः राजनैतिक सगठन, नेवाः देयू दबूया पदाधिकारित व तामांग समुदायया नेतातय् मंकाः मुँज्यां पहिचानया पक्षय् जनमत श्रृजना यायेत उगु सभा यायेगु क्वछ्यूगु खः । सभा असनय् १ ता इलय् जुइ । भूगोल पार्कं निसें छगू र्याली न्ह्याकाः सभास्थल तक थ्यंकेगु ग्वसाःखलकं ग्वसाःग्वःगु दु ।
सभाया तयारी यायेकथं अाः वइगु अाइतवाः नेवाः राजनैतिक खलः पुच लिसें नेवाः जातीय, साँस्कृतिक, भाषिक खलः लिसे सहलह ब्याकाः नेवाः संघर्ष समिति दयेकेत थौंया मुँज्यां ग्वसाःग्वःगु दु ।
मुँज्याय् नेपाल तामांग घेदुंगया नायः मोहन गोले व तामांग नेतात, नेपाल समाजवादी नेवाः संघया संरक्षक अनुप सिं सुवाल, जनता समाजवादी नेवाः संघया अध्यक्ष ज्ञानेन्द्र रत्न बज्राचार्य, नेपाल नेवाः राष्ट्रिय संघ (समाजवादी)या अध्यक्ष माइल बाबु द्यःला व नेवाः देयू दबूया पदाधिकारितय्सं ब्वति कयादीगु खः । मुँज्याया सभापतित्व नेवाः मुक्ति मोर्चाया अध्यक्ष दिलिप महर्जनं यानादीगु खः ।