येँ, कछलाथ्व ०४ । लय् लय् पतिकं यानाच्वंगु नामसंगीति पाठ थुगुसिइ सबलबहालय् यात । थथुपुईं आचार्य गुथि संरक्षण समिति अन्तर्गत नामसंगीति स्तोत्र पाठ उपसमितिया ग्वसालय् मन्त्रसिद्धि महाविहारय् थुगु पाठ मैत्रीपुर महाविहार, क्वाबहा:या राजु बज्राचार्यया नेतृत्वय् जूगु ख: ।
ज्याझ्वलय् मन्त्रसिद्धि महाविहार संरक्षण समितिया छ्याञ्जे राजेन्द्र बज्राचार्यं सबलबहा:या म्हसिका बियादीगु ख: । ज्याझ्वलय् सबलबहा:या थाय्पा चक्रहर्ष बज्राचार्य, मन्त्रसिद्धि महाविहार संरक्षण समितिया संयोजक रविहर्ष बज्राचार्य नापं गुरुजु, गुरुमाँजु, उपासक – उपासिकापिन्सं ब्वति कयादीगु ख: । ज्याझ्व: सर्जु बज्राचार्यं न्ह्याकादीगु ख: ।
थुगु ज्याझ्व: लय् लय्पतिकं संल्हू कुन्हु जुयाच्वंगु दु । ज्याझ्व:या संयोजक अमर रत्न बज्राचार्यया कथं आ: वइगु पुस १ गते संल्हू कुन्हुया नामसंगीति पाठ राजकीर्ति महाविहार तेबहालय् जुइ ।