म्हिगः शनिवाः नुवाकोट जिल्लाया विदुर नगरालपकाय् ३ नं प्रदेसया संसदं नेपालभाषा व तामाङ भाषायात सरकारी कामकाजि भाषा यायेगु विधेयक सर्वसम्मतं पारित याःगु लसताय् सांसदपिन्त सुभाय् द्यछाल । नेवाः देय् दबू नुवाकोट जिल्ला समिति व नेवाः देय् दबू विदुर नगर समितिया मंकाः ग्वसालय् बटारया पुलांगु बजारय् च्वंगु फल्चाय् उगु ज्याझ्वः जूगु खः ।
नेवाः देय् दबू नुवाकोट जिल्ला समितिया नायः रामप्रसाद जोशीया सभापतित्वय् ज्याझ्वः जूगु खः । नेवाः देय् दबू ३ नं प्रदेश समितिया दुजः नरेन्द्र प्रधानं न्ह्याकादीगु उगु ज्याझ्वलय् नेवाः देय् दबू स्वनिगः विशेष प्रदेशया नायः श्रीकृष्ण महर्जनं मूपाहांकथं ब्वति कयादीगु खः । ३ नं प्रदेस संसदं सर्वसम्मतं पारित याःगु प्रादेशिक भाषा विधेकय् नेवाः भाय्यात प्रदेशया कामकाजि भाषाया रुपय् लागू यायेगु व नेपाल संवतयात छेलेगु धकाः न्ह्यथनातःगु कंसें मूपाहां महर्जनं आः स्थानीय सरकारयात तकं स्थानिय भाषाया ऐन दयेके बिइत भूमिका म्हितेमाःगु कनादिल । वय्कलं भाषा विधेयक पारित याःगु दिं असोज २२ गतेयात आः नेपालभाषा लसता दिं कथं हनेमाः धयादिल ।
स्थानीय थीथी खलः पुचःया प्रतिनिधिपिन्सं नं ज्याझ्वलय् भिंतुना न्वचू तयादीगु खः । वहेकुन्हु बहनी प्रादेशिक भाषा विधेयक पारित जूगु लसताय् उगु हे फल्चाय् मैनमत च्याकाः धिमे बाजं थानाः उत्सव न्यायेकूगु खः ।
