नेसं ११४५ थिंलागा ३, येँ । नेपाल ललितकला प्रज्ञा–प्रतिष्ठानया ग्वसालय् नेवाः लोककला कार्यशाला जुल । उगु कार्यशालाय् नेवाः संस्कृतिविद् गणेशराम लाछीलिसे अन्तरसंवाद याःगु खः । लाछीं कार्यशालाय् यःमरिया आयाम व पक्षया चर्चा याःगु खः ।
ज्याझ्वलय् प्रतिष्ठानया कुलपति नारदमणि हार्तम्छालीं यःमरियात नेपालया महत्त्वपूर्ण अमूर्त सांस्कृतिक सम्पदाकथं व्याख्या यानादिल । वय्कलं लोककलाय् यःमरियात मूर्तिकलाकथं म्हसीकी धैदिल । थुकिया खोज तथा अनुसन्धान यायेमाःगु खँय् वय्कलं बःबियादिल ।
ज्याझ्वलय् प्रतिष्ठानया उपकुलपति लालकाजी लामां नेवाः कलां नेपाली संस्कृतियात समृद्ध यायेत महत्त्वपूर्ण भूमिका म्हितूगु धयादिल ।
लोककला विभाग प्रमुख प्रदिप अधिकारीं नेवाः समुदाय लोकसंस्कृति, लोकपरम्परा तथा लोककलाय्मा तःमि जूगु धयादिल ।
ज्याझ्वःया संयोजक मनरा प्रजापतिं नेवाः समाजय् प्रत्यक्ष रूपय् अमूर्त संस्कृति स्वयेफैगु कनादिल । वय्कलं थ्वज्वःगु कला समाजया पहिचान जक मखुसे आममनूया च्यूताःया विषय जूगुलिं थ्वज्वःगु ज्याझ्वः यायेमाःगु धयादिल ।
