येँ । नेसं ११४४ बछलाथ्व १३ कुन्हु नेवाः मिसा दबुलिं थःगु न्हय्क्वःगु बुसादँ हन । ज्याझ्वः भूमि व्यवस्था, सहकारी तथा गरिबी निवारण मन्त्री रन्जिता श्रेष्ठ चौधरीं उलेज्या यानादीगु खः ।
ज्याझ्वलय् ग्वसाखलकं न्हापाम्ह मिसा न्यायाधीश सत्यभामा माथेमा व न्हापाम्ह मिसा चित्रकार सारदा चित्रकारयात हन ।
ज्याझ्वलय् रत्न देवी सिरपाः व १०,०००।— तका नेवाः मिसा दबूया संस्थापक अध्यक्ष संरक्षक रश्मिला प्रजापतिं शीला साय्मियात लः ल्हानादिल । प्रमिला श्रेष्ठयात विना देवी सिरपाः व १०,००१।— तका नेवाः मिसा दबूया नायः कस्तुरी श्रेष्ठं लःल्हानादिल ।
ज्याझ्वलय् नेपाल अादिवासी जनजाती महिला महासंघया कमला भट्टचनं नेवाःतय्गु संस्कार संस्कृति दकले न्ह्यःने लाःगु खँ कनादिल । जनजातिइ मध्यय् नं नेवाः व थकालि न्ह्यःने लाःगु खँ न्ह्यथंसें वय्कलं भाषा, संस्कृति, कला मिसातय्सं ल्यंकाच्वंगु प्रसंग न्ह्यब्वयादीसें सरकारं जनजाति मिसायात स्वइगु दृष्टिकोण पाकेमाःगु व जनजातिपिं तःधंगु प्रधानमन्त्री जुइगु क्षमता दु धयादिल ।
नेवाः मिसा दबूया संस्थापक अध्यक्ष रश्मिला प्रजापतिं नेवाः मिसा दबुली सुरुइ जःत तसकं म्ह्वः जूगुसां नेवाः देय् दबूया विधानय् ३३ प्रतिशत मिसात दयेमाःगु प्रवाधानयात सम्वोधन यायेत नेवाः मिसातय्त राष्ट्रिय रुपं संगठित यायेत थ्व संगठन नीस्वनागु धयादिल । ज्याझ्वलय् नेवाः देयू दबूया नायः पवित्र बज्राचार्यं नं नुगःखँ तयादीगु खः ।