येँ, नेसं ११४४ थिंलागा १४ । संविधान प्रदत्त नेवाः अधिकार संस्थागत यायेत व ३ नम्वर प्रदेशया पुनःनामाकरण लगायतया मुद्दाय् अान्दोलन यायेत नेवाः राष्ट्रिय मंकाः संघर्ष समिति घोषणा जुइत्त्यंगु दु । पहिचान पक्षधर थीथी राजनैतिक दलया नेवाः कवः व नेवाः देय् दबूया संयोजनय् थ्व हे वइगु पोहेलाथ्व नवमि कुन्हु जुइगु १४ क्वःगु नेवाः एकता दिवसय् थुगु संघर्ष समिति घोषणा यायेत्यंगु खः ।
वंगु बुधवाः कुन्हु नेवाः देय् दबूया ग्वसालय् च्वंगु थीथी राजनीतिक पार्टीया नेवाः संगठन, नेवाः खलः पुचः, नेवाः देय् दबूया मंकाः मुँज्यां नेवाः एकता दिवस तःजिक हनेत मंकाः ग्वसाःखलः नीस्वंगु खः । उगु हे मुँज्यां उगु संघर्ष समिति घोषणा यायेगु नं क्वछ्यूगु खः ।
उगु मुँज्याय् संघर्ष समिति घोषणा यायेत अवधारणा पत्र व सहभागी जुइगु थीथी संस्थाया दथुइ जुइगु समझदारी पत्र नं सहलहया लागिं पितब्यूगु दु ।