येँ, कछलाथ्व ९ । नेपाल समाजवादी पार्टीया थौं च्वंगु कार्यकारीणी समितिया मुँज्यां पार्टी अध्यक्ष डा. बाबुराम भट्टराइया नेतृत्वय् वार्ता संवाद समिति नीस्वंगु दु । मुँज्याय् ब्वति काःम्ह छम्ह दुजलं ब्यूगु जानकारीकथं उगु पार्टीया समाजवादी ध्रुवीकरण मुद्दालिसे ज्वःलाःगु मेगु शक्तिलिसे सम्वाद, छलफल, ध्रुविकरण प्रकृया लागिं थुकथं समिति नीस्वंगु खः ।
उगु सम्वाद समिती उगु पार्टीपाखें थीथी सरकारय् दुथ्यानाच्वंपिं मन्त्री महेन्द्र राय यादव व गंगानारायण श्रेष्ठ लिसें दुर्गा सोंब, रमेश यादव व जनक शाह दुथ्याः ।
पार्टीं सःतातःगु केन्द्रीय समितिया मुँज्या व सांगठनिक सुदृढिकरण अभियानयात निरन्तरता बिइगु नं मुँज्यां क्वछ्यूगु धाःगु दु ।