येँ, नेसं ११४४ प्वहेलागा ९ । डा.बाबुराम भट्टराई व महिन्द्र राय यादवं नेतृत्व यानाच्वंगु नेपाल समाजवादी पार्टी (नेसपा) या केन्द्रिय समितिया न्याक्वःगु पूर्ण बैठक म्हिगः थीथी च्यागू निर्णया यानाः क्वचायेकल ।
बैठकं डा.बाबुराम भट्टराई नं ल्ह्वनाच्वंगु प्रत्यक्ष निर्वाचित कार्यकारी राष्ट्रपतीय प्रणालीया बारे, वित्तिय ख्यलय् खनेदूगु समस्या, भ्रष्टाचार नियन्त्रणया खँय् सहलह ब्याकूगु खः ।
बैठकं शान्ति प्रक्रियाया ल्यंगु ज्या पूवंकेमाःगु, प्रदेश १ या नां सम्बन्धय् आन्दोलनरत पहिचान पक्षधरया आन्दोलनय् ऐक्यबद्धता क्यंसें प्रदेशया नामाकरण पहिचानया लिधंसाय् हे जुइमाःगु मान्यताय् दृढ जुसें १ नम्वर प्रदेश लगायतया नां पहिचानया लिधंसाय् तयेमाःगु, नेसपाया केन्द्रीय सदस्य जीतमान पुन ‘मार्शल’ यात रिहा यायेमाःगु माग यायेगु, जनयुद्धकालीन मुद्दा सत्य निरुपण तथा मेलमिलाप आयोगं समाधान यायेमाःगु, विधान संशोधन, विचार व एजेन्डा ज्वःलाःगु मेगु पार्टीलिसे संवादयात निरन्तरता बिइगु निर्णय याःगु दु ।
बैठकय् केन्द्रीय अध्यक्षपिं, प्रदेशया अध्यक्षपिं, जनवर्गीय संगठन संगठनया इञ्चार्ज व अादिवासी जनजाती महासंघया अध्यक्षं थःगु बिचाः तःगु धयातःगु दु ।
नेसपां न्याक्वःगु पूर्ण बैठकं पारित याःगु निर्णय थुकथं पिथंगु दु ।
