येँ, कछलाथ्व ०८ । सम्भवत: नेपा:या इतिहासय् दकसिवे न्हापां पशुपतिइ बौध्द स्तोत्र नामसंगीतिया पाठ जूगु दु । मुख: अष्टमीया अवसरय् आर्य मञ्जुश्री नामसंगीति स्तोत्र पाठ खलःया ग्वसालय् थुगु ज्याझ्व: जूगु ख: ।
खल:या कजि गौतम वज्राचार्यया कथं न्हापा पशुपतिइ नामसंगीति पाठ यायेत अनुमति का:वंबलय् अनुमति मब्यूगु खः । पशुपति विकास कोषया पुलांम्ह छ्याञ्जे नरोत्तम वैद्यया ग्वाहालिं पाठ यायेगु अनुमति का:गु ख: ।
ज्याझ्वलय् वज्रयान महासंघया नाय: राजेन्द्र बज्राचार्यं मुख: अष्टमीया महत्वबारे कनादिल । नामसंगीति पाठ ललेन्द्र बज्राचार्यं न्ह्याकादीगु ख: ।