नेसं ११४४ वछलाथ्व ८, येँ । ३ नम्वर प्रदेश सरकारं नकतिनि स्थापना प्रकृया न्ह्याकूगु प्रदेश विश्वविद्यालयय् नेवाः अध्ययन विभाग नं स्थापित याकेत थौं प्रदेश विश्वविद्यालय सरोकार पुचः नीस्वंगु दु । थीथी क्याम्पसय् प्राध्यापन यानाच्वंपिं व स्नातकोत्तर उतिर्णपिनि छगू भेलां २५ जः दुथ्याःगु पुचः भाजु अनुप सिं सुवालया संयोजकत्वय् नीस्वंगु खः । थ्व पुचलं सम्वन्धित विश्वविद्यालयय् नेवाः अध्ययन विभाग स्थापित यायेत पैरवि याइ धयातःगु दु ।
तामांग समुदायं नं थुकथं हे सरोकार पुचः दयेकाः उगु विश्वविद्यायय् तामांग अध्ययन विभाग नीस्वनेत पैरवी याइगु जूगु दु । थुगु नेवाः पुचलं तामांग पुचःलिसे सहकार्य यानाः न्ह्यज्याइगु नं धयातःगु दु ।
छुं न्हिंन्ह्यव ३ नं प्रदेश सरकारं प्रदेश उच्च शिक्षा ऐन, २०७८ कार्यान्वयन यासें प्रदेश विश्वविद्यालय स्थापनाया लागि आवेदन माग याःगु खः । थथे आवेदन कायेन्ह्यव लच्छिति न्ह्यव च्वंगु प्रदेश मन्त्रिपरिषद् बैठकं हेटौंडाय् सार्वजनिक विश्वविद्यालय नीस्वनेत प्रदेश उच्च शिक्षा ऐन २०७८ बमोजिम विश्वविद्यालय स्थापना तथा सञ्चालनया विधान स्वीकृत याःगु खः । थ्व हे प्रयोजनया लागिं वंगु बैशाख २४ गते मुख्यमन्त्रि थम्हं हे प्रदेश शिक्षा विकास निर्देशनालय तयातःगु भवनय् बागमती विश्वविद्यालयया सम्पर्क कार्यालय उद्घाटन यायेधुंकूगु दु । थ्व विश्वविद्याललयं प्राविधिक व व्यावसायिक शिक्षाय् बःबिइगु धयातःगु दु । थुकिया लागिं मकवानपुर कलेज लिसे सहलह ब्याकाच्वंगु धाःगु दु ।
