नेसं ११४४ चौलागा ९, येँ । ३ नम्वर प्रदेशया सांसद समिता खड्गी श्रेष्ठं प्रादेशीक भाषा विधेयक लागू यायेगु सन्दर्भय् नेवाः न्ह्यलुवाः व विज्ञपिं लिसे सहलह ब्याकादिल । ज्याझ्वलय् धाःकथं पारित ऐन कार्यान्वयणया झ्वलय् वयेफूगु पंगः चीकेत सांसदया ल्याखं थम्हं यायेमाःगु ज्या सिइकेत माननीय सांसदं थीथी ख्यःया विज्ञपिंलिसे थ्व सहलह ब्याकूगु खः ।
अनुप सिं सुवालं सहजिकरण याःगु थ्व ज्याझ्वलय् नेवाः न्ह्यलुवाःपिं भीमसेनदास श्रेष्ठ, पुकार महर्जन, पवित्र बज्राचार्य, प्रा. डा. ओमकारेश्वर श्रेष्ठ, अमृत योञ्जन, सुनिल कुमार पटेल, उमेश स्थापित, सुरेश मानन्धर, दिलिप शाहीं थःथःगु बिचाः बियादीगु खः । विज्ञपिंसं भाषा ऐन पारित जूगु अतिकं ऐतिहासिक लसता खःसां कार्यान्वयण पक्षय् सरकार व जनता निखलं हे सम्वेदनशील जुयाः ज्या ताःलाकेमाःगु खँय् बः बियादिल ।
ज्याझ्वलं सांसद समितायात ३ नं प्रदेशया मुख्यमन्त्री शालिकराम जम्मरकट्टेलयात प्रादेशीक भाषा ऐन पारित जूगु १८० न्हुं धुंकाः च्वनीगु न्हापांगु मन्त्रीपरिषद् बैठकय् नेपाली भाय् अतिरिक्त नेपालभाषा व तामांगभाषां नं निर्णय अभिलेखिकरण यायेत व ऐन कार्यान्वयणया झ्वलय् ऐनया दफा १३ य् व्यवस्था जूकथं विज्ञ समूह गठन यायेत ज्ञापन बिइत सल्लाह बिल ।
ज्याझ्वलय् ब्वतिकाःपिंसं थुकथं सांसद थः हे विषयगत विज्ञलिसे सहलह ब्याकःवःगु देसय् हे दकले न्हापांगु जूगु व थुकथंया ज्याझ्वः न्ह्याकूगुलिं सांसद समितायात सुभाय् व भिंतुना बिल ।
ज्याझ्वः प्रदेश सांसद समिता खड्गी श्रेष्ठया सचिवालय सदस्य प्रसन्दलाल खड्गीं न्ह्याकूगु खः ।