क्लबं नेवाः छेँ दयेकेत १ लख दाँ ग्वाहालि यात
येँ, ११४४ कछलाथ्व १३ । बज्राचार्य क्लबया प्यक्वःगु तःमुँज्या व न्हय्क्वःगु दँ मुँज्यां क्लवया कार्यसमितिया न्हूधाः याःगु दु । मुँज्याया उलेज्या ज्याझ्वःया मूपाहाँ उच्च अदालतया माननीय न्यायाधीश राज्यलक्ष्मी बज्राचार्यं यानादीगु ख: ।
थुबलय् हे जूगु हना ज्याझ्वलय् ललितपुर उद्योग वाणिज्य संघया नाय: विश्व राज बज्राचार्य व सशस्त्र प्रहरी बलया एस.पि. समेनन्द बज्राचार्ययात हन ।
ज्याझ्वलय् बज्राचार्य क्लबया नाय: सर्जु बज्राचार्यं नेवा: छेँ दयेकेत १,०१,१०१ तकाया चेक नेवा: देय् दबूया नाय: पवित्र बज्राचार्ययात ल:ल्हात । क्लबं सामूहिक पञ्चदान ज्याझ्व:पाखें मुंगु दां ल:ल्हाःगु ख: ।
ज्याझ्वलय् लसकुस न्वचु डा. मनिस रत्न बज्राचार्य, वार्षिक प्रगति विवरण सृजन बज्राचार्य व आर्थिक प्रतिवेदन ज्ञान रत्न बज्राचार्यं न्ह्यब्वयादीगु ख: ।
मुंज्यां बज्राचार्य क्लबया न्हूगु ज्यासना पुच: सर्वसम्मतं ल्यःगु दु । न्हूगु ज्यासना पुचलय् सर्जु बज्राचार्य हानं नाय: जुयादीगु दु । न्वकू सृजन बज्राचार्य, छ्याञ्जे अल्बर्ट बज्राचार्य, ल्यू छ्याञ्जे श्रद्धा बज्राचार्य, दांभरी मोनिशमानन्द बज्राचार्य, ल्यू दांभरी कुशल बज्राचार्य ल्यःगु दु । सजन बज्राचार्य, बिजय राज बज्राचार्य, स्नेहा बज्राचार्य, आकाश बज्राचार्य व श्रीजा बज्राचार्य दुज: जुयादीगु दु ।
ज्याझ्वलय् ३ नम्वर प्रदेशया सभासद् माननीय शैलेन्द्रमान बज्राचार्य, न्हूदँ समारोह समितिया नाय: प्रा.डा. नरेशमान बज्राचार्य, चर्यानृत्य गुरु यज्ञमानपति बज्राचार्य, प्रा.डा. हृदय रत्न बज्राचार्य लगायत थी थी क्षेत्रयापिं प्रतिष्ठित बज्राचार्यपिनिगु उपस्थिति दुगु ख: । नेपालभाषा मंका खल: छेँय् जूगु थ्व ज्याझ्व: अञ्जु बज्राचार्यं न्ह्याकादीगु ख: ।