भुइजःसि, कछलाथ्व १ । नेपाल संवतयात छ्यलेगु संघीय सरकारया निर्णय व ३ नं प्रदेशसभां पारित याःगु प्रादेशिक भाषा विधयेकयात मध्यनजरय् तयाः बुढानिलकण्ठ नगरपालिकां नं नेवाः भाय् व नेपाल संवतयात स्थानीय सरकारय् छेलेत थःपिं तयार दुगु मेयर मिठाराम अधिकारी व उपमेयर अनिता लामां धयादीगु दु । ढुंगेयुगया ल्वाभः लुयावःगु स्वनिगःया महत्वपुर्ण थाय् भुइजःसिइ न्हूदँया लसताय् जूगु भिंतुना र्याली लिपा जूगु ज्याझ्वलय् वय्कःपिंसं थथे धयादीगु खः ।
नेवाः भाय् व नेपाल सम्वतयात स्थानीय सरकारय् छेलेगु प्रतिवद्धता मेयरपिंसं बियादीगुलिं ज्याझ्वलय् नेवाः देय् दबूया संरक्षक मल्ल के सुन्दर व नेवाः देय् दबू स्वनिगः विशेष प्रदेशया नायः श्रीकृष्ण महर्जनं वय्कःपिन्त सुभाय् बियादिल ।
ज्याझ्वलय् नेवाः देय् दबू बुढानिलकण्ठ नगर समितिया नायाः ब्रम्हदेव श्रेष्ठं नं नुगः खँ तयादीगु, भुइजःसि मंकाः पुचःया नायः हरिश्चन्द्र श्रेष्ठया सभापतित्वय् जूगु खः ।