लुँया भावय् न्हूगु रेकर्ड
येँ । अन्तराष्ट्रिय बजारय् लुँया भाः अझं थाहां वनाः न्हूगु रेकर्ड कायम जूगु दु । नेपालय् लुँ तोलां १ लाख १७ हजार ७ सय तका थ्यन ।
म्हिगः अन्तर्राष्ट्रिय बजारय् लुँ प्रतिऔंश ५ डलर थाहां वनाः २०१५ डलर कायम जूगु खः । मध्यपूर्वीय युद्ध तत्काल मदीगु खःसा लुँभाः न्हिथं थाहां वनेफइगु अनुमान नेपाल सुनचाँदी व्यवसायी महासंघया पुलांम्ह अध्यक्ष लिसे बजाः विश्लेषक तेजरत्न शाक्य यानादीगु दु । वय्कःया कथं सन् २०२४ दुने लुँया भाः २ हजार १ सय डलर थ्यनीगु अनुमान यानातःगु खःसां नं व सिबें न्ह्यः हे अन्तर्राष्ट्रिय बजारय् लुँया २ हजार १ सय डलर थ्यने फइगु खँ धयादीगु दु । अन्तराष्ट्रिय रुपं मुद्रास्फीटी अप्वया वनाच्वंगुलिं युरोपियन युनियनं अमेरिकी फेडरल बैंकयात ब्याजदर थमकायेत दबाब बीवं लुँया भाः थहां वंगु नं वय्कलं धयादीगु दु ।
थ्व सिबेंन्ह्यः अमेरिकी फेडरेल बैंकं प्यक्वः तक ब्याजदर थकायेधुंकूगु दु । फेडेरल बैंकं न्हापा २ प्रतिशत जक ब्याज बियाच्वंगु खःसां नं आः वयाः बैंकया ब्याजदर ५ प्रतिशत थ्यने धुंकूगु दु । युरोपियन युनियनं अमेरिकी फेडरल बैंक ब्याजदर अप्वयेकेवं बजारय् बेसाःभाः थिके जुइगु धासें ब्याजदर थमकायेत अमेरिकायात दबाब बियावयाच्वंगु खः ।