द हिमालयन हेड्रिक्सया उपनामं चर्चित कलाकार अशेष डंगोलं संयुक्त राज्य अमेरिकाय् एकल सांगितिक ज्याझ्वः न्ह्यब्वल । वंगु पुस २० गते थुगु ज्याझ्वः जूगु खः ।
हिमालयन ग्रिल वाटर फोन्ट प्यासिफिक कोष्ट हाइवेयलय् थ्यंमथ्य निघौतक्क न्ह्याःगु उगु ज्याझ्वलय् डंगोलं २५ दँ मेहेनत यानाः दयेकादिइगु नेपाःया मौलिक सांगितिक धुन न्ह्यब्वयादिइगु खः । ९० मिनेटतक्क न्ह्याःगु उगु ज्याझ्वलय् बेस गीतारय् प्रवेश काफ्ले व ड्रमय् आयुष डंगोल ‘द म्याड हनि’ पिसं साथ बियादिइगु खः । टुर म्यानेजरेया भूमिका प्यूष दाहाल खः ।
उगु ज्याझ्वलय् वय्कलं हालादिइगु मौलिक म्ये जात्रा भाइब, कस्मिक भाइब, फङ्क भाइब ब्लुज, ग्रीड, इन्सर्च टुअर्ड फ्रीडम, तिमीलाई म, जिमी हेन्ड्रिक्सया स्वंपु कभर म्ये व छगू परम्परागत ब्लुज म्ये न्ह्यब्वयादिइगु खः ।
वइगु माघ ६ गते आइबि रुम, एल्बानी क्यालिफोनियाया ग्वसालय् जुइगु ज्याझ्वलय् अशेष डंगोलयात ब्लुज एम्बोसी अफ नेपाल टाइटलं छायेपीत्यंगु जानकारी वःगु दु । भाजु डंगोल संयुक्त राज्य अमेरिकाया सांगितिक भ्रमण पुरा यानाः वइगु माघ १२ गते नेपालय् लिथ्यनी । वय्कलं थ्वसिबें न्ह्यः भाद्र २९ गतेनिसें ३० गतेतक्क बेस्ट द् याम ब्लुज महोतोत्सवय् नं उत्कृष्ट प्रदर्शन यानादिइगु खः ।