यल, काैलागा ७ । ३ नं प्रदेशसभां प्रादेशिक भाषा विधेयक पारित याःगु लसताय् थनया मंगलबजारय्य् मैनमत च्याकाः लसकुसयासें प्रदेश सांसदपिन्त सुभाय् द्यछाल ।
नेवाः देय् दबू यल जिल्ला समितिया ग्वसालय् जूगु उगु ज्याझ्वलय् प्रदेश सांसदपिं रघुनाथ महर्जन, प्रेमभक्त महर्जन, नेवाः देय् दबू स्वनिगः विशेष प्रदेशया नायः श्रीकृष्ण महर्जन, नेवाः देय् दबू यल जिल्लाया नायः रविन्द्र शाक्य, यल नेवाः समाजया नायः विनोद ताम्राकारपिन्सं नवानादीगु खः ।
ज्याझ्वलय् ३ नं प्रदेश सांसद रघनाथ महर्जनं आःया अवस्थाय् नेवाःतसें थः मस्तय्त नं थःगु छेँय् नेवाः भाय् स्यनेगु ज्या यायेमाः धकाः बः बियादिल । मेम्ह सांसद प्रेमभक्त महर्जनं भाषा विधेयक कार्यान्वयनया नितिं बः बिइमाः धयादिल ।
श्रीकृष्ण महर्जनं भाषा विधेयक पारित जूगु धइगु संघयाताय नितिं हे बांलाःगु ज्या जूगु खः धयादिसें नेवाः लिपियात नं न्ह्यःने यंकेगु नाप नापं नेवाःतय्सं याना वयाच्वंगु नेपाल संंवतया आन्दोलनया भावनायात तकं दुथ्याकाः आः नेपाल संवतयात तकं प्रदेशं कार्यान्वयन याइगु खँ विधेयकय् उल्लेख जुयाच्वंगु दु धयादिल । वय्कलं भाषाया कारणं विभेद यात धाःसा कानुनी कारवाही जुइगु प्रावधान दुगु निसें शिक्षा, संचार ख्यलय् तकं नेवाः भाय्यात कामकाजि भाषाया रुपय् लागू याइगु अवस्था दु धयादिल ।
ज्याझ्वलय् नेवाः देय् दबूया थीथी तह, यलया जातीय समाजया प्रतिनिधिपिं, नेवाः अभियन्तापिं व थीथी ब्यक्तिपिंसं नं ब्निवति कयादीगु खः ।