येँ, ११४४ थिंलाथ्व ३ । संगीतकार मनराजा नकःमिं लयबद्ध यानादीगु च्यापु म्ये म्हिगः छगू ज्याझ्वःया दथुइ सार्वजनिक जुल । यल महानगरपालिकाया मेयर भाजु चिरिबाबु महर्जनं थ्व च्यापुतिं म्ये सार्वजनिक यानादीगु खः ।
संगीतकार नकःमिं हे लयचिनादीगु एल्वम ‘मैचाया सपलय्’ आशा नकःमि लिसे म्ये हालाः नेवाः संगीत ख्यलय् पिलूझाःम्ह मोहन शाक्यं थ्वपालय् स्थापित थीथी च्याम्ह नेवाः मिसा म्येहालामिपिंलिसे च्यापु ज्वःम्ये हालाः ‘असं बजाः मंगः बजाः’ म्यूजिक भिडियो एल्वम पितबियादीगु दु ।
थ्व सिबें न्ह्यः नं मैंचाया सपलय् हालातःगु मुक्कं म्येया म्युजिक भिडियो न्ह्यब्वादीम्ह म्येहालामि शाक्यं छक्वलं हे च्यापु म्ये पितबियादीगु खः ।
थ्व एल्वमय् जनकवि दुर्गालाल श्रेष्ठ, वंशीधर बज्राचार्य, भूषण प्रसाद श्रेष्ठ, नातिबज्र बज्राचार्य, मङ्गल महर्जन व चण्डेस्वर महर्जनं म्ये च्वयादीगु दु ।
एल्वमय् मोहन शाक्यलिसे सृजना श्रेष्ठ, कविता जोशी, लसता जोशी, निशा देसार, सरिता शाही, रोजी डंगोल श्रेष्ठ, गंगादेवी महर्जन व रत्नशोभा महर्जनं थीथी ज्वःम्ये हालादीगु दु ।
म्यूजिक भिडियो एल्वमय् सुरज नापितं स्वपु म्येय्, निपुती रामकृष्ण खड्गी व विश्वास बज्राचार्यं स्वपु म्येय् निर्देशन यानादीगु दु ।
ज्याझ्वलय् प्रकाश सायमिं एल्वमया समीक्षा यानादीगु खः ।