येँ, कछलाथ्व ०८ । दँय्दसंथें थुगुुसिइ नं सिखंमूबहालय् अष्टमी ब्रत च्वन । श्रीखण्ड तरुमूल महाविहारया मय्जु पुच:या ग्वसालय् थुगु ब्रत च्वंगु खः ।
ब्रतय् ब्वति काःपिन्त राजगुरु मञ्जुश्री रत्न बज्राचार्यं निर्देशन बियाबिज्या:गु ख: । गुरुजुया निर्देशन कथं गुरुमांजु रबिता बज्राचार्यं मण्डलय् गन छु यायेगु क्यनाबिज्या:गु ख: । पूजा प्रक्रियाय् गौतम बज्राचार्य व रत्नकुमार बज्राचार्य गुरुजुपिन्सं ग्वाहालि यानाबिज्या:गु ख: ।
ज्याझ्वलय् स्वीगुम्हसिनं ब्वति कयादीगु ख: । सुवर्ण बज्राचार्य थकाली व रिद्धि बज्राचार्य नकिं जुया: पूजा न्ह्याकूगु ख: । मय्जु पुच:या संयोजक मीना शाक्यया कथं दँय्दसं मुख: अष्टमी कुन्हु जुयाच्वंगु थुगु ज्याझ्व: थ्व न्याक्व:गु ख: ।
अष्टमी ब्रत च्वनीबलय् अष्टशीलया पालन याइ । अष्टमी ब्रत च्वनागुया उद्देश्य अशुध्द मनयात शुध्द यायेगु ख: ।