ने.सं. ११४३ कौलागा षष्ठी कुन्हु येँय् म्हपूजाया मन्द: म्हसिका ज्याझ्व: जुल । न्हूदँ राष्ट्रिय समारोह समिति नेसं ११४४ या मिसा उपसमितिया ग्वसालय् छगू मिसा भेला यासें उगु ज्याझ्वः याःगु खः ।
ज्याझ्वलय् न्हूदँ समारोह समितिया नाय: प्रा.डा. नरेशमान बज्राचार्यं म्हपूजाया मन्द:, मन्द:या महत्व, मन्द: च्वयेगु विधि न्ह्यब्वयादीगु खः । ब्वति कयादीपिंंसं न्यंगु न्ह्यस:या लिस: ब्युसें म्हपूजा यायेबलय् गुकथं पूजा यायेगु धइगु बारे भविष्यय् छगू ज्याझ्व: हे न्ह्याकेफइगु नं वय्कलं धयादिल । ज्याझ्वलय् भीमरत्न बज्राचार्यं मन्द: च्वया: क्यनादीगु खः ।
ज्याझ्वलय् ब्वति कयादीपिंसं मन्द:बारे यक्वं खँ सिइके दुगुलिं लसता प्वंकादिल । ज्याझ्वः नानीहेरा महर्जनं न्ह्याकादीगु खः ।