नेसं ११४४ ञलाथ्व ८, फुङलिङ । मुक्कुम्लुङ संरक्षण आन्दोलनयात ऐक्यबद्धता क्यनेत ‘मुन्धुमी मुक्कुम्लुङय्आदिवासी कला प्रतिरोध’ यात्रा जुयाच्वंगु दु । थ्व आन्दोलन आदीवासीतय् सहमति मदुसां चन्द्र ढकालया कम्पनीं जवरजस्ती केबुल कार सञ्चालन यायेत्यंगु विरोधय् नो केबुलकार अभियान अन्तरगत जुयाच्वंगु खः ।
वंगु सेप्टेम्वर ४ निसें फुङलिङय् देशया अभियन्तापिं व आदिवासी अधिकारकर्मीपिं मुनाच्वंगु दु । ‘आन्दोलनया अभिलेख, अभिलेखया आन्दोलन’यालागि मुक्कुम्लुङ संरक्षण संयुक्त संघर्ष समिति, पाथीभरा केबलकार खारेजी संयुक्त संघर्ष समिति, किरात याक्थुङ चुम्लुङ, ताप्लेजुङया नेतृत्वय् आन्दोलन जुयाच्वंगु दु । उगु आन्दोलनय् ऐक्यबद्धता क्यनेत इन्डिजिनियस विडाउट बोर्डरस्, याक्थुङ चो सङ्जुम्भो, आर्टट्रीसम्बद्ध कलाकारपिं, अनुसन्धातात व अभियन्तातय्सं ब्वति कयाच्वंगु दु ।
कलाकारपिं सुवास तामाङ (मोरङ), सपना नेपाली (कास्की), मनरा प्रजापति (काठमाडौं), सारा कोइँच सुनुवार (धनुषा), दीक्षा राई (खोटाङ), सोनाम चाम्लिङ राई (खोटाङ), कला लिम्बू (मोरङ), गंगा लिम्बू (ताप्लेजुङ), नाम्साङ (किरण) लिम्बू (इलाम), पुजन लिम्बू (सुनसरी), मेख लिम्बू (धनकुटा) तथा विनोद लिम्बू (झापा)पिंसं ज्याझ्वलय् ब्वति कयाच्वंगु दु । अनुसन्धातात व नागरिक अभियन्ता तथा अधिकारकर्मीपिं कैलाश राई (भोजपुर), निरन्ती तुम्बापो (पाँचथर), गोबिन्द छन्त्याल (बागलुङ), डा. सविन निङ्लेखु लिम्बू (तेह्रथुम) व सेन्दो सेलिङ लिम्बू (इलाम) नं ज्याझ्वलय् दी ।
थ्व प्रतिरोध प्रदर्शन वइगु सेप्टेम्वर १३ तक न्ह्याइ धयातःगु दु ।