नेसं ११४४ ञलाथ्व ८, फुङ्लिङ । किरात-लिम्बूया धार्मिक आस्थाया केन्द्रबिन्दु मुक्कुम्लुङय् दयेकेत्यंगु केबलकार परियोजनाविरुद्ध स्थानीय आदिवासीतय्सं विरोध प्रदर्शन याःगु दु । पाथीभरा केबलकार खारेजी संयुक्त सङ्घर्ष समितिया नेतृत्वय् सदरमुकाम फुङ्लिङय् बुधबार विरोध र्याली ब्वःगु खः । ब्वज्याय् कलाकारीताया माध्यम नं छ्यःगु दु ।
मुक्कुम्लुङय् केबुलकार निर्माणया विरोधया पक्षधरपिंसं जुलुसय् थीथी कला न्ह्यब्वःगु खः । किराँत याक्थुङ चुम्लुङं ब्वना यंकूपिं झिंछम्ह कलाकारतय्सं अन हे च्वनाः केबुल कार निर्माणया विरोधय् चित्रकला च्वःगु खः । व चित्रकलायात स्थानीय पहिचानवादी नेतातय्सं थम्हं क्वबुयाः झाँक्री सहित बजार चाःह्यूगु खः । जुलुसय् स्वम्ह मिसा कलाकारपिं मनरा प्रजापति, सरा तुनिच कोइंच, सपना नेपालीं परफरमेन्स आर्ट न्ह्यब्वःगु खः ।
जुलुसय् केबुलकार विरूद्ध, मुक्कुमलुङया प्राकृतिक विनाशया विरूद्ध, किरात-लिम्बु सम्पदाय् अतिक्रमण विरूद्ध नारावाजी याःगु खः । जुलुसं वीरेन्द्र चौकय् कोणसभा याःगु खः । कोणसभाय् सङ्घर्ष समितिया पदाधिकारी, पहिचानवादी नेतातय्सं सम्बोधन याःगु खः । सम्बोधनया झ्वलय् आदिवासी लिम्बू समुदायया ऐतिहासिक धार्मिकस्थल मुक्कुम्लुङया अतिक्रमण यानाः दयेकेत्यंगु केबलकारयात पनेगु प्रतिबद्धता वक्तापिसं याःगु दु । येँय् नं वंपिं कलाकारतय्सं दयेकूगु पंया केबुल कारयात सांकेतिक दहन यानाः विरोध सभा क्वचायेकूगु खः ।
वंगु आइतवार फुङ्लिङय् केबुलकार परियोजनाया विरूद्धय् कलाः प्रदर्शनी जुयाच्वंगु जःखः केबुलकार निर्माण प्रक्रिया न्ह्याकेत माग यानाः मोटरसाइकल र्याली याःगु दु । थुकिं अन केबुलकार परियोजनाया पक्षी-विपक्षीतय् दथुइ भिडन्त जुइ फूगु अवस्था श्रृजना जूगु दु । केबलकार परियोजना खारेजया लागिं संघर्ष यानाच्वंपिंसं मुक्कुम्लुङय् जबरजस्ती अतिक्रमण याःसा न्ह्याथेंज्वःगु मूल्य नं पुलेत लिमचिलेगु चेतावनी ब्यूगु दु ।
