येँ, कछलागा १० । मियामोतो ग्लोबल डिजास्टर रिलिफंआनन्दकुटी विद्यापीठयात मैत्री भवन ल:ल्हागु दु । २०७२ साल (ने.सं. ११३५)या भुखाचं क्षतिग्रस्त जूगु छेँयात थुगु संस्थां रेट्रोफिटिङ यानाब्यूगु ख: ।
उगु ज्याझ्व:या उलेज्या यानाबिज्या:सें भिक्षु मैत्री महास्थविरं पञ्चशील नं बियाबिज्या:गु ख: । विद्यापीठया न्यागू तगिंया ब्वनामि सभ्यता बज्राचार्यं नेवा: म्येय् लसकुस प्याखँ न्ह्यब्वयादीगु ख: । आनन्दकुटी विद्यापीठ सार्वजनिक शैक्षिक गुथिया नाय: भिक्षु प्रज्ञामूर्ति व विद्यालय व्यवस्थापन समितिया नाय: पुष्कर मान शाक्यं संस्थाया नाय: सुनिल शाक्ययात कदर पत्र ल:ल्हानादील । विद्यापीठया प्रधानाध्यापक सुजन बज्राचार्यं सुभाय् देछानादीगु ज्याझ्व: संस्थाया बोर्ड दुज: राजेन्द्र सुवालं न्ह्याकादीगु ख: ।
मैत्री भवनया रेट्रोफिटिङ यायेत मा:गु दक्वं आर्थिक व प्राविधिक ग्वाहालि मियामोतो संस्थां या:गु ख: । आनन्दकुटी विद्यापीठय् दुगु प्यखा छेँयात बुध्द धर्मया चतुर्ब्रम्हविहार अन्तर्गत मैत्री, करुणा, मुदिता व उपेक्षा कथं नां छुनात:गु ख: । प्यखा छेँमध्ये थुगु मैत्री भवन सन् १९५९ स नेपा:या न्हापांम्ह जननिर्वाचित प्रधानमन्त्री विश्वेश्वर प्रसाद कोइरालाया निमन्त्रणाय् नेपा: भ्रमणय् व:म्ह स्वतन्त्र भारतया न्हापांम्ह प्रधानमन्त्री जवाहर लाल नेहरुं शिलान्यास या:गु ख: ।