तोलां १ लाख १७ हजार ४ सय थ्यन
येँ । नेपाःया लुँवहः बजारय् लुँभाः न्हूगु रेकर्ड कायम जूगु दु । १ लाख १७ हजार तका बजाः भाः जुयाच्वंगु लुँभाः म्हिगः तोलां न्यासः तका थाहां वनाः १ लाख १७ हजार ४ सय तक थ्यनाः न्हूगु रेकर्ड तल ।
वहया भाः नं तोलां १५ तका थाहां वनाः झिंन्यासः थ्यन ।
मध्यपूर्वय् जुयाच्वंगु इजरायल व हमासया युद्धं थथे लुँया भाः थाहां वंगु खः । नेपाल सुनचाँदी व्यवसायी महासंघया पुलांम्ह नायः तेजरत्न शाक्यं धयादीकथं अन्तर्राष्ट्रिय मुद्रास्फीति अप्वयाः वनाच्वंगुलिं यानाः लुँइ लगानी याइपिं अप्वयेवं लुँया भाः थाहां वंगु खः ।
चिनियाँ बैंकं थःगु रिजर्भ अप्वयेकेत लुँइ लगानी याःगुलिं नं लुँभावय् दबाब लाःवंगु खः । म्हिगः जक चिनियाँ बैंकं १७.६ टन लुँ न्यानाः रिजर्भ याःगु दु । थुकिं नं लुँबजारय् लिच्वः लाकल । भाजु शाक्याकथं उखे अमेरिकी फेडरल बैंकं ब्याजदर थमकायेगु नीति नालाकाःगुलिं नं लुँ लगानीकर्ता उत्साहित जुयाः लुँया भाः थाहां वन । अमेरिकी बैंकं ५ प्रतिशत ब्याज बियाच्वंगु दु । म्हीग अन्तर्राष्ट्रिय बजारय् लुँ प्रतिऔंश २००३ डलर थ्यनाच्वंगु खःसा म्हिगः ७ डलर थाहां वनाः २०१० डलर कायम जूगु खः ।
अन्तर्राष्ट्रिय रुपं डलर नं बल्लानाच्वंगु दु । अमेरिकी डलर थाहां वनाः १३३.७० पैसा जुयाच्वंगु दु । अमेरिकी डलरया वं नं न्हूगु रेकर्ड तःगु दु । अमेरिकी डलर थाहां वनाच्वंगु इलय् लुँया भाः कुहाँ वयेमाःगु खःसां नं लुँइ लगानीकर्ताया आकर्षण अप्वःगुलिं लुँभाः कुहां मवःगु खनेदु ।
लुँया भाः वनाः २१०० डलर कायम जुइफइगु विश्लेषण जुयाच्वंगु दु । लुँभाः २१ डलर थ्यन धाःसा नेपालय् लुँ तोलां १ लाख २२ हजार निसें १ लाख २५ हजार तक थ्यने फइगु नं विश्लेषन जूगु दु ।