वागमती विश्वविद्यालय्-नेवाः सरोकार पुचःया प्रारम्भिक मुना

नेसं ११४४ बछलाथ्व १४, यल । थौं वागमती विश्वविद्यालयय् नेवाः सरोकार पुचःया प्रारम्भिक मुना मुन । नेपालभाषा विषय अध्यापन यानाच्वंपिं व स्नातकोत्तर क्वचायेधुंकूपिंसं उगु विश्ववद्यालयय् नेवाः अध्ययन विभाग पलिस्था यायेमाःगु खँय् सरोकार क्यनाः थुकथं मुंगु खः ।

मुनाय् अनुप सिं सुवालं वागमति प्रदेशं न्ह्याकूगु वागमती विश्वविद्यायलयय् नेवाः अध्ययन विभाग तयेमाःगु कानूनी, राजनैतिक व व्यवहारिक पक्ष न्ह्यब्वयादिल । प्रदेश सरकारी कामकाजी भाषा एेन २०८० इ दुथ्याःगु प्रावधान कथं नेवाःतय्सं थःगु अधिकार छ्यलेत थ्व विश्वविद्यालयय् नेवाः अध्ययन अध्यापन जुइमाःगु कनादिल । वागमती विश्वविद्यालयं थःगु ज्या न्ह्याकेधुंकूगुलिं नेवाःत सकलें जानाः राजनैतिक, सामाजिक, शैक्षिक पहल यानाः उगु विश्वविद्यालयय् नेवाः अध्ययन विभाग पलिस्था यायेमाःगु खँय् बः बियादिल ।

भेला नेपालभाषा केन्द्रीय विभाग प्रमुख सप्रा डा. राजनलाल जोशीया सभापतित्वय् च्वंगु खः । डां जोशीं नेवाःतय्गु बाहुल्य दूगु वामगती प्रदेशय् विश्वविद्यालय चायेकूगु थ्व अवसरय् नेवाः अध्ययन विभाग तयेकेत अभियान न्ह्याकूगु ज्याया सर्हाहना यानादिल । वय्कलं थ्व विश्वविद्यालययात माःगु माक्व जनशक्ति थःगु विभागं निर्माण यानातयेधुंकूगु न्ह्यथनादिल । वय्कलं थ्व विश्वविद्यालयय् नेवाः अध्ययन विभाग पलिस्था यायेत माःगु प्राज्ञीक, शैक्षिक लगायतया मुक्कं ज्याय् थःपिनि ग्वाहालि दइगु नं कनादिल ।

थुगु मुनाय् स्वीम्ह नेपालभाषाया प्राध्यापकपिं व स्नातकोत्तर क्वचाःपिंसं ब्वति कयादीगु खः । ज्याझ्वलय् रविन श्रेष्ठं लसकुस यानादीगु खः । ज्याझ्वः अच्युत बज्राचार्यं न्ह्याकादीगु खः ।