नेसं ११४५ बछलाथ्व ५, येँ । नेसपा नयाँ शक्तिया अध्यक्ष डा.बाबुराम भट्टराईं नेपाःया मुख्य स्वंगू दल श्री ३ जुयाच्वंगु द्वपं ब्यूगु दु । म्हिगः मे दिवसया लसताय् जूगु छगू ज्याझ्वलय् थुकथं द्वपं ब्यूगु खः ।
डा. भट्टराइं धयादी, “राजनीति छुं पुचःया जनतायात म्हगस क्यनेगु, चुनाव त्याकेगु, सत्ताय् वनाः जनतां पूगु करयात दाखुइगु ज्यायात राजनीति धयाच्वंगु दु । थौंया श्री तीनतय्सं पालंपाः सत्ताय् वनाः मोजमस्ती यानाच्वंगु दु । थुमिगु कारणं जनतां थुपिं श्री ३ सिबें म्हिगःया श्री ५ हे पाय्छि जूगु तायेकाच्वंगु दु ।” थ्व श्री तीन व श्री पाँच निगुलिं पाय्छि मजूगु वय्कलं दावी यानादीगु दु ।
सभायात सम्वोधन यासें नेवाः न्ह्यलुवाः अनुप सिं सुवालं नेवाः समाजय् जातिय व्यवस्था लजगाया लिधंसाय् जूगुलिं अधिंकाश नेवाः मजदुर जूगु न्ह्यथनादिल । वय्कलं देश विकास जुइमफूगु कारण नेवाःजातियात २५० दँ न्ह्यवंनिसें राज्यया मूलधारय् मथ्याकुगुलिं खःगु दावी यानादिल । वय्कलं नेवाः स्वायत्त राज्यया पलिस्था, कार्यकारी राष्ट्रपति व पूर्ण समानुपातिक निर्वाचन प्रणाली लागू यानाः नेवाःतय्त नं राज्यया मूलधारय् संलग्न यायेमाःगु खँय् बः बियादिल । नेवाःय्सं गोरखा राज्यया बजार गुलजार याःगु प्रसंग न्ह्यब्वसें नेवालं मुक्कं देशया विकास यायेफूगु दावी यानादिल ।
ज्याझ्वलय् नेपाल समाजवादी नेवाः संघया न्वकू न्हुछेशोभा तुलाधर, नयाँ शक्तिया आशा तामाङ व मजदुर युनियनया अध्यक्ष विष्णु अधिकारिं नं सम्वोधन याःगु खः । ज्याझ्वः रूपनारायण श्रेष्ठं न्ह्याकूगु खः ।
मे दिवसया लसताय् थनया असनय् नेपाल समाजवादी नेवाः संघ व नेपाल समाजवादी ट्रेड युनियन महासंघया मंकाः ग्वसालय् थुगु सभा जूगु खः ।
