नेसं ११४४ वछलागा ५, सक्व । थनया नांदंम्ह न्ह्यलुवाः गोविन्द श्रेष्ठ थौं सुथय् ३ ता इलय् थःगु हे निवासय् मन्त । वय्क: नेपालभाषा व नेवाः समाजया सेवक, नेपाल समाजवादी नेवाः संघया नायः माधव श्रेष्ठया अबुजु खः । वय्क:या अन्तेष्टि थौं १०.२८ ता ई सुथय् सक्वय् हे जुल ।
सामाजिक ज्याय् न्ह्यलुवाः श्रेष्ठया जन्म सक्वय् १९९६ साल आश्विन १८ गते जूगु खः । २०३० सालंनिसें राजनितिइ सकृयम्ह थ्वय्क: २०६२ साल तक (दथुइ छक्वः बाहेक) निरन्तर बज्रयोगिनी गाउँ पंचायतया प्रधानपंच व २०४६ सालय् निक्वः बज्रयोगिनी गाउँ बिकास समितिइ अध्यक्षय् त्या:गु खः । मदुम्ह श्रेष्ठं बज्रयोगिनी मन्दिर संरक्षण समिति व शालिनदी सुधार समिती नीस्वनेन्ह्यव हे मुक्कं पूजाआजाया जिम्मेवारी कयाः परम्परा न्ह्याकूगु खः । लिपांगु खुसी २०७९ सालय् शंखरापुर नगरपालिकाया सम्पदा संरक्षण समितिया संयोजक जुयाः ज्या यानाच्वंगु खः । वय्क: राजनैतिक जीवनय् राप्रपाया पुर्व केन्द्रिय सदस्य खः ।
वय्क:या पार्थीव शरिरय् राप्रपाया केन्द्रिय अध्यक्ष राजेन्द्र लिङ्डेनं पार्टिया झण्डा न्ययेकूगु खः । मदुम्हेसिया सनाः वनेत सक्वया जनता व थीथी राजनैतिक सामाजिक व्यक्तित्व थाय्थासं वःगु खः । मदुम्ह श्रेष्ठया काय् छम्ह व म्ह्याय् न्याम्ह दु ।