ह्याउँनिभा: येँ, कछलागा ०५ । वाकबज्र अध्ययन मण्डलया ग्वसालय् सप्तविधानुत्तर पूजा या:गु दु । उबलय् पञ्चरक्षा, अपरिमितायु, ग्रहशान्ति आदि स्तोत्र तथा धारणीया पाठ नं या:गु ख: । अध्ययन मण्डलपाखें न्ह्याकूगु बौध्द दर्शन व कर्मकाण्डया प्रशिक्षण कक्षाय् ब्वति का:पिनिगु पुच:पाखें थुगु पूजा क्वाबहालय् या:गु ख: ।
२१म्ह बज्राचार्यपिन्सं यानाबिज्या:गु थुगु पूजाया मूलाचार्य मूल प्रशिक्षक राजु बज्राचार्य व उपाध्याय प्रशिक्षार्थी प्रसन्न बज्राचार्य ख: । अध्ययन मण्डलया दुज: मिलन बज्राचार्यया कथं स्वलाय् छक: न्ह्यानाच्वंगु थुगु पूजा थ्व प्वक्व:गु ख: ।
सप्तविधानुत्तर पूजा न्हय्गु चरणया पूजा ख: । गण्डव्यूह सूत्रय् उल्लेख जूकथं थ्व न्हय्गू चरण धैगु वन्दना, पूजना, पापदेशना, पुण्यानुमोदना, अध्येषणा, याचना व पुण्यपरिणामना ख: । बुध्द, धर्म व संघयात वन्दना यायेगु, बुध्द, धर्म व संघयात पूजा यायेगु, राग, द्वेष व मोहया वशय् लाना: थम्हसिनं काय, वाक व चित्तपाखें यानागु पापयात कनेगु, बुध्द, बोधिसत्वपिन्सं यानाबिज्या:गु पुण्य खना: प्रसन्नतापूर्वक अनुमोदन यायेगु, बुध्दपिन्त धर्मचक्र प्रवर्तन यानाबिज्याहुँ धका: अध्येषणा यायेगु, निर्वाण जुइत समर्थवानपिं बुध्दपिन्त निर्वाण मजूसे जगतया हितया लागि हानं हानं जन्म जुयाबिज्याहुँ धका: याचना यायेगु व थ्व वन्दना, पूजना, पापदेशना, पुण्यानुमोदना, अध्येषणा व याचना यानागु पुण्यया प्रभावं जगतया हित यायेत जि थ: स्वयं हे बुध्द जुइ फयेमा धका: पुण्यपरिणामना यायेगु ख: ।