नेसं ११४६ कछलाथ्व ६, येँ । थौं विद्यमान नेपाली राजनीतिक अवस्थाय् नेवाः न्ह्यलुवाःपिंसं सरोकार क्यन । नेवाः राजनीतिक महागुथिया ग्वसालय् जूगु समसायिक राजनीतिइ नेवाः सरोकार विषयक सहलह ज्याझ्वलय् थुकथं थीथी राजनीतिक दलय् अावद्ध व समाज एवम् भाषा सेवकपिंसं थुकथं सरोकार क्यंगु खः ।
ज्याझ्वलय् अनुप सिं सुवालं सहलह पौ न्ह्यब्वयादीगु खः । सहलह नेवाः लागाया सुरक्षा, संघीयता-लोकतान्त्रिक गणतन्त्र-धर्मनिरपेक्षताया लागिं नेवाः एकवद्धता व जुइत्यंगु चुनावय् नेवाः मंकाः उम्मेदवार विषयसं सहलह केन्द्रीत जूगु खः ।
ज्याझ्वलय् हिसिला यमि, प्रा.डा. विम श्रेष्ठ, प्रा.डा. अोमकारेश्वर श्रेष्ठ, सप्रा. डा. राजनलाल जोशी, ३ नं. प्रदेश सभा सांसद समिता खड्गी श्रेष्ठ, राजेन्द्र कुमार श्रेष्ठं विषयगत न्वचू तयादीगु खः ।
ज्याझ्वलय् मनरत्न शाक्य, दिपक तुलाधर, भीम महर्जन, धनबहादुर तिमिला, नविन थेच्वमि, मञ्जु बज्राचार्य, भिंतुना श्रेष्ठ, शोभा बज्राचार्य, अरविन्द सिं, निरञ्जन ताम्रकार, भागवत नरसिंह प्रधान, प्रेमराज शिल्पकार, प्रशान्त डंगोल, गोपाल महर्जन, सुरेश प्रधानं सहलहखय् थःथःगु बिचाः न्ह्यब्वयादीगु खः ।
अनुप सिं सुवालं ज्याझ्वलय् न्ह्यब्वःगु थीथी विचाःया लिधंसाय् राजनीतिक महागुथिया अग्रसरताय् याकनं हे दलगत व राजनीतिक मुद्दाय् विचाः ज्वःलाःगु थीथी खलःपुचःया दथुइ सञ्जाल दयेकेगु, विद्यमान राजनीतिक परिवेशय् खवरदारी सभा यायेगु, वृहद नेवाः राजनीतिक सहलह ब्याकेगु, वइगु चुनावय् मंकाः नेवाः उम्मेदवारीता बीगु सम्भाव्यता मालेगु लिच्वः पिकाःगु दु ।
ज्याझ्वः ग्वसाखलःया कजि माधव स्यस्यं न्ह्याकादीगु खः ।
