त्वखा । थनया उत्तरी भेगय् मिसापिन्त लजगाया तालिम केन्द्र व मस्तय् लागिं मोन्टेसोरि ब्वनेकुथि चाल । स्थानीय मय्जुपिन्त लक्षित यानाः थ्व भेगया हे न्हापांगु थुगु सिचु पाठशाला तथा ट्रेनिङ सेन्टर चायेकूगु खः ।
वंगु कछलागा ९ कुन्हु थुगु केन्द्रया उलेज्या जूगु खः । त्वखा नगरपालिकाया उपमेयर मुरारी तामाङ, त्वखा नपा वडा नं ३ अध्यक्ष रमेश डंगोल, वडा नं २ अध्यक्ष धर्वेन्दर श्रेष्ठ व शिक्षाप्रेमी स्यनामिपिंसं मंकाः कथं रिबन चानाः थुगु केन्द्रया उलेज्या यानादीगु खः ।
थ्यंमथ्यं नीदँन्ह्यः निसें शिक्षण पेसाय् कृयाशिल स्यनामिपिसं अध्यापन याइगु थुगु पाठशालाय् डे कियर, मन्टेश्वरी व मन्टेश्वरी ट्रेनिङया कक्षा नं न्ह्याइ धाःगु दु ।
पाठशालाय् पारिवारिक वातावरणय् मस्तय्गु इच्छा, अाकांक्षा, मनोविज्ञानयात ध्यानय् तया प्रयोगात्मक, अडियो, भिडियो पद्धति, प्रयोगात्मक पद्धति छ्यलाः मस्तय्त आखः ब्वंकेगुलिसें सभ्य, अनुशासित, कर्तव्य बोध, सुसंस्कार स्यनेत सिचु पाठशाला तथा ट्रेनिङ सेन्टर पलिस्था यानागु प्रिन्सिपल सरिता महर्जनं न्ह्यथनादिल ।
मन्टेश्वरी ट्रेनिङ सेन्टर न्ह्यासांनिसें स्थानीय मिसापिन्त लजगाःया ह्वःताः चुलाकेत ताः लाःगु दु।