येँ, कौलागा १३ । ‘स्वन्ति नख:या पूजाविधि’ सफूया पितब्वज्या जूगु दु । सर्वज्ञ रत्न बज्राचार्यं च्वयादीगु थुगु सफू रत्नकीर्ति महाविहार अध्ययन मण्डलया ग्वसालय् पिदंगु खः ।
सफू महाविहारया नाय: विद्यामान विलास बज्राचार्य, सफूया च्वमि सर्वज्ञ रत्न बज्राचार्य, संस्कृतिविद् मदनसेन बज्राचार्य व रत्नकीर्ति महाविहार अध्ययन मण्डलया नाय: जितेन्द्र विलास बज्राचार्यं मंकाःकथं पितब्वःगु खः ।
ज्याझ्वलय् न्ववासें च्वमि सर्वज्ञ रत्न बज्राचार्यं स्वन्ति नख: हनेबलय् पुज्यायेमा:गु लक्ष्मीपूजा, म्हपूजा व किजापूजायात वज्रयान विधिकथं सरलतापूर्वक यायेफयेमा धका: सफू च्वयागु धयादिल । सफूया समीक्षा संस्कृतिविद् मदनसेन बज्राचार्यं यानादिल । महाविहारया छ्याञ्जे सागरमान बज्राचार्यं नं नुग: खँ प्वंकादिल ।
ज्याझ्व: जितेन्द्र विलास बज्राचार्यया सभापतित्वय् जूगु खः । रबिन्द्र बज्राचार्यं लसकुस न्वचू बियादीगु ख: । रमिता बज्राचार्यं ज्याझ्वः न्ह्याकादीगु खः ।
रत्नकीर्ति महाविहार अध्ययन मण्डलपाखें पिहांव:गु थुगु सफूतिइ वज्रयान कथं स्वन्ति नख:या पूजा अःपुक यायेगु विधि च्वयात:गु दु । पूजा यायेमास्त्य वयाः नं याये मस:पिन्त थ्व सफुतिं यक्व ग्वाहालि जुइगु भलसा काःगु दु ।