येँ, कछलाथ्व १ । ह्याउँनिभालं खमू अनलाइन तरकारी बजाः एप व ह्याउँनिभाः न्यूज पोर्टाल पितब्यूगु दु । न्हूदँया लसताय् लाकाः ह्याउँनिभालं थःगु निगू प्रोजेक्टया शुभारम्भ याःगु खः ।
ह्याउँनिभाःया संरक्षक अनुप सिं सुवालं खमू व न्यूज पोर्टल पितबीगु ज्या ह्याउँनिभालं ल्ह्वनाच्वंगु मुद्दा नेवाः इकोनोमिक्सया अवधारणा प्रवर्द्धन व अभ्यासया छगू ब्व जूगु ध्वाःथुइकादिल । ह्याउँनिभालं नेवाः लगानी नेवाः बजाः विस्तार नेवाः समाजया विस्तारया लागिं मूनारा बियाः नेवाः समाजया अार्थिक सुदृढताया लागिं थीथी अभ्यास न्ह्याकाच्वंगु व थ्व निगू प्रोजेक्ट नं उकिया हे क्रमवद्धता खः धयादिल । खमूया न्हापांगु चरणया अभ्यासया सफलता धुंकाः थ्व निगूगु चरणया अभ्यास जूगु व थुकी अावद्ध जूपिं सब्सक्राइबरपिन्त दंगु भावं भिंगु तरकारी सेवा छेँय् थ्यंक थ्यंकाः नं रिडेम, छुट व वोनसया माध्यमं सन्तुष्ट यायेफयेधुंकाः खमू एपं बजाः विस्तार याइगु कनादिसें भाजु सुवालं कनादिल । बुँ लिसे सम्वन्धित ज्या न्ह्याकेत थ्व एपं तिबः बीगु भलसा नं वय्कलं प्वंकादिल । ह्यउँनिभालं नेवाः सञ्चार ख्यःया विकासय् योगदान बिइत टेलिभिज, रेडियो, पत्रिका व अनलाइन न्यूज पोर्टाल पिथनेत ज्या न्ह्याकाच्वंगु स्पष्ट यानदिसें वय्कलं टेलिभिजन धुंकाः अाः ह्याउँनिभा न्यूज पोर्टाल पितब्वयेत्यंगु स्पष्ट यानादिल ।
संरक्षक मनराजा रञ्जितं खमू एपय् अावद्ध जूपिं सकस्यां दंगु भावं भिंगु सेवा कायेफइगु विधि थःपिंसं लुइकेधुंकागुलिं थ्व एपया माध्यमं थःपिनिगु अाज्जुइ अःपुक हे थ्यनीगु कनादिल । थुकी अावद्ध जूपिन्त अापालं कथंया लवः दुगुलिं सकसितं थुकी अावद्ध जुइत नं वय्कलं इनाप यानादिल । ह्याउँनिभाःया सञ्चार ख्यलय् योगदानयात निरन्तरता बिइत ह्याउँनिभाः न्यूज पोर्टालं तःधंगु योगदान बिइगु भलसा भाजु रञ्जितं प्वंकादिल । वय्कलं टेलिभिजन व न्यूज पोर्टाल धुंकाः अाः रेडियो स्टेशन चायेकेत ज्या न्ह्याकेगु स्पष्ट यानादिसें ह्याउँनिभालं नेवाः संगीत व संकिपा ख्यलय् सकृयपिं कलाकारपिनि लागिं नं ज्या न्ह्याकेत्यनागु कनादिल ।
ह्याउनिभाःया संस्थापक नायः मनरत्न शाक्यं नेसं ११०८ निसें सकृय थ्व संस्थां नेवाः समाजया विकासया लागिं अाःतक नं निरन्तर ज्या यानाच्वंगु प्रसंग न्ह्यथंसें अाः ह्याउँनिभाः न्हूगु प्रविधिं नेवाः समाजया विकासय् सकृय जूगुलिं लसता प्वंकादिल ।
संरक्षक धनबहादुर महर्जनं थः नायः जुयाच्वंबलय् शुरू जूगु खमू प्रोजेक्ट न्हूगु स्वरूपं नेवाः समाजया सेवा यायेत्यंगुलिं लसता प्वंकादिल । वय्कलं इकथं ह्याउँनिभाः न्ह्याबलें न्ह्यज्यानाच्वंगुली गर्व यानादिसें ह्याउँनिभालं न्हूदँया लसताय् शुरू याःगु सिइताःमतयाः थौं त्वाःत्वालय् न्ह्यानाच्वंगु खनीबलय् च्यानाच्वंगु प्रतेक सिइताः व सुकुण्डाया जलय् ह्याउँनिभाः पिलुयाच्वंगु थम्हं खंगु धयादिल ।
ह्याउँनिभाःया संरक्षकपिं मनरत्न शाक्य, अनुप सिं सुवाल, मनराजा रञ्जित, यादव रञ्जित व धनबहादुर महर्जनं मंकाःकथं खमू एप अनलाइन तरकारी बजाः पितब्वयादीगु खः ।
खमू एपया बोर्डया दुजःपिं व ह्याउँनिभाः न्यूज पोर्टालया सम्पादक व व्यवस्थापक मण्डलयात म्हसिकेगु झ्वलय् ज्याझ्वःया मूपाहाँ नेवाः देयू दबूया नायः पवित्र बज्रचायं वय्कःपिन्त हना नं दीगु खः ।
ह्याउँनिभाः न्यूज पोर्टालया पित ब्वज्या मूपाहाँ बज्राचार्यं यानादिल । वय्कलं खमूया न्हापांगु चरणया अभ्यासं निसें हे थ्व प्रोजेक्टया लक्षं प्रभावित जुयाः थम्हं नं साथ समर्थन व ग्वाहालि बियागु प्रसंग न्ह्यब्वसें थुकिया सफलतां नेवाः समाजयात तःताकथंया लवः दैगु जूगुलिं थःगु समर्थनयात निरन्तरता बिइगु भलसा बियादिल । नेवाः संघसंस्थां थथे छगू जक ख्यलय् थःत केन्द्रित यायेबलय् वख्यलय् विज्ञ जुइफैगु नं ध्वाःथुइकादिल । सञ्चार ख्यलय् नेवाः इकोनोमिक्सया लागिं नेवाः भूमीका स्पष्ट यायेत ह्याउँनिभालं यानाच्वंगु ज्यायात च्वछासें ह्याउँनिभाः न्यूज पोर्टालं यायेफैगु योगदानया चर्चा यानादिल ।
ज्याझ्वः ह्याउँनिभा कार्यसमितिया छ्याञ्जे दयाचन्द्र श्रेष्ठया सभापतित्वय् जूगु, अच्युत रत्न बज्राचार्यं न्ह्याकादीगु खः ।
(किपाः दिनेश बज्रचार्य)
भिंतुना