(फोटो फिचर)
पलांति, नेसं ११४४ पोहेलाथ्व ९ । दँय्दसं न्यायेकाच्वंगु नेवाः एकता दिवस थुगुसिइ पलांतिइ तःजिक हन । १४क्वःगु नेवाः एकता दिवस नेवाः देय् दबूया संयोजनय् थीथी नेवाः संघसंस्थाया मंकाः ग्वसालय् थ्व ज्याझ्वः जूगु खः । थुगुसिया ज्याझ्वलय् ३ नम्वर प्रदेशं पारित याःगु प्रादेशिक भाषा एेन छेलेगु मुद्दाय् केन्द्रीत जुल ।
सभायात स्थानीय ग्वसाःखलःया कजि व हलिं नेवाः दबूया न्वकू सुरेश सैंजुं लसकुस यानादीगु खः ।
ज्याझ्वःया सभानायः व नेवाः देय् दबूया नायः पवित्र बज्राचार्यं उलेधुंकाः अाैपचारिक ज्याझ्वः शुरू जूगु खः ।
ज्याझ्वलय् नेवाः देय् दबूया न्वकू उमेश स्थापितं नेवाः एकता दिवसया अवधारणा न्ह्यब्वयादीगु खः ।
ज्याझ्वलय् पलांतिया स्थानीय ग्वसाःखलकय् दुथ्याःगु थीथी संघसंस्थां नेवाः एकताया मंकाः प्रतिबद्धता प्वंकल । लोकतान्त्रिक नेवाः दबूया नायः भगवाद शाक्यया संयोजनय् थुगु ज्या जूगु खः ।
ज्याझ्वलय् पलांति नगरपालिकाया मेयर रामशरण भण्डारीं सम्वोधन यानादिल । वय्कलं थुगु नगरपालिकायात साँस्कृतिक संरक्षित क्षेत्र घोषणा यायेत तयारी यानाच्वनागु कनादिल ।
ज्याझ्वलय् झिंनिक्वःगु नेवाः एकता दिवसकुन्हु ख्वनाय् राज्ययात न्यंगु न्यागू न्ह्यसः लिसा कयाः न्यन । थुगु न्यनेज्या जनता समाजवादी नेवाः संघया नायः ज्ञानेन्द्ररत्न बज्राचार्यपाखें जूगु खः ।
ज्याझ्वलय् पनौति घोषणा नेपाल समाजवादी नेवाः संघया संरक्षक अनुप सिं सुवालं यानादिल । वय्कलं ३ नम्वर प्रदेशं प्रादेशिक भाषा विधेयक पारित याःगुलि मुक्कं प्रदेश सभा व नेतृत्वकर्ता मुख्यमन्त्री शालिकराम जम्मरकट्टेल, विभागिय दायीत्व पूवंकादीम्ह अान्तरिक मामिला व कानून मन्त्री गंगानारायण श्रेष्ठ व विभागीय मन्त्रीकथं विधेयक सभाय् न्ह्यब्वयादीम्ह पुकार महर्जनयात सुभाय् बियादिल । पारित जूगु विधेयक व्यवहारय् लागू यायेत सकल नेवाः छधी जुयाः न्ह्यज्यायेमानिगुलिं नेवाः संघर्ष समिति नीस्वनेत्यंगु धयादिल ।
ज्याझ्वः जुइन्ह्यः नेपालमण्डलया थीथी लागां ब्वति काःवःपिंसं साँस्कृतिक जुलुस पिकानाः पलांति चाःह्यूगु खः । ज्याझ्वः नेवाः देयू दबूया मूछ्याञ्जे सत्यनारायण डंगोल व श्रीकृष्ण महर्जनं न्ह्याकादीगु खः । ज्याझ्वलय् थीथी थासं ब्वतिकाःपिंसं साँस्कृतिक ज्या नं न्ह्यब्वःगु खः ।
