नेसं ११४५ कछलाथ्व ९, येँ ।
नेपाल समाजवादी नेवाः संघं प्रत्यक्ष निर्वाचित कार्यकारिणी प्रमुख व पूर्ण समानुपातिक प्रतिनिधित्व विषयस अन्तर पार्टी सम्वाद ज्याझ्वः याःगु दु । ज्याझ्वलय् थीथी पार्टीया नेतातय्सं विषयगत विचाः न्ह्यब्वःगु खः ।
ज्याझ्वःया सभापति नेपाल समाजवादी नेवाः संघया नायः माधव स्यस्यं ज्याझ्वःया शुभारम्भ यानादिसें नेवाः संघ पूर्ण समानुपातिक समावेशी, प्रत्यक्ष निर्वाचित कार्यकारी व प्रदेशया नामाकरण पहिचानया लिधंसाय् जुइमाःगु मुद्दा पूमवंतले न्ह्याथेंज्वःगु संघर्ष यायेत नं लिमचीगु प्रतिवद्धता क्यनादिल ।
संघया संरक्षक अनुप सिं सुवालं ज्याझ्वः यायेमाःगु औचित्य कनेगु झ्वलय् समानुपातिक समावेशीया सवालय् थीथी पार्टीया विधानय् दुथ्यानाच्वंगु प्रावधान न्ह्यब्वःगु खः । भाजु सुवालं प्रदेशया नामाकरण पहिचान विरोधी जूगु खँय् घोर आपत्ति प्वंकुसें जनस्तरं हे प्रदेशया नां पहिचानया लिधंसाय् यायेगु लागिं नेसपा नयाँ शक्तिं आवंलि ३ नम्वर प्रदेशयात नेवाः-ताम्सालिङ-वागमती नां छुनाः प्रयोगय् हइगु कनादिल ।
ज्याझ्वलय् न्हूदँ समारोह समितिया नायः लिसें पूर्वमन्त्री राजेन्द्र प्रसाद श्रेष्ठं समानुपातिक प्रतिनिधित्वयात कयाः विश्व अभ्यासया प्रसंग न्ह्यब्वादिल । वय्कलं देशया आमूल परिवर्तनया लागिं पूर्ण समानुपातिक प्रणाली हे उत्तम विकल्प खःगु धयादिल ।
पूर्वमन्त्री लिसें राष्ट्रिय स्वतन्त्र पार्टीया सांसद विराजभक्त श्रेष्ठं पूर्ण समानुपातिक प्रणाली छ्यःसा देशं युवा पलायन पनेत ताःलाइगु बिचाः ब्वयादिल । न्ह्यवया प्रदेश सभाय् नयाँ शक्तिया सांसदं ३ नम्वर प्रदेशया नामाकरणय् नेवाः ताम्सालिङ नां छुइत ग्वाहालि फ्वंबलय् थः आवद्ध पार्टीं याके मब्यूगुलिं थः निरिह जूगु थःत आ:तक नं मछिनाच्वंगु प्रसंग वय्कलं कनादिल । देशया आमूल परिवर्तनया लागिं नयाँ शक्तिलिसे कार्यगत एकता यायेफैगु विचाः ब्वयादिल ।
३ नं प्रदेशया सामाजिक विकासमन्त्री हरिप्रभा खड्गी श्रेष्ठं पूर्ण समानुपातिक व प्रत्यक्ष निर्वाचित कार्यकारी थेंज्वःगु राष्ट्रिय मुद्दाया सन्दर्भय् पार्टी दुने व्यापक वहस यायेत थः तयार जूगु कनादिल ।
विवेकशील पार्टीया नेता मिलन पाण्डें थः येँय् हे जन्म जुयाः ब्वलंगुलिं थनया आदिवासीतय्गु घाः थम्हं थूगु धयादिसें देशया फुक्कं तप्काय् समानुपातिक प्रतिनिधित्व जुइमाःगु खँय् थःपिं स्पष्ट जूगु कनादिल । नयाँ शक्ति लिसे बैचारिक मन्थन वहस यानाः थःपिं न्ह्याःवनेत व कार्यगत एकता यायेत थःपिं तयार दूगु कनादिल ।
नेवाः न्ह्यलुवा मल्ल के सुन्दरं नेपालयात थीथी प्रणालीया अभ्यास यायेगु नामय् प्रयोगशाला दयेके मज्यूगु धयादिल । दोष प्रणालीया मखु प्रबृतिया खः, बैकल्पिक शक्ति निर्माण यायेगु बाँलाःगु खँ खः अय्नं प्रवृति हे भिनेमाः धयादिल । प्रत्यक्ष निर्वाचित कार्यकारी अभ्यास स्थानीय निकायलय् सफल जुइधुंकूगुलिं थुकी शंका यायेम्वाःल अय्नं राजनीतिककर्मिपिनि प्रबृतिया कारणं सचेत जुइमाः धयादिल ।
नेपाल समाजवादी पार्टी नयाँ शक्तिया संयोजक व पूर्व प्रधानमन्त्री डा. बाबुराम भट्टराईं देश विकास यायेगु व विगतय् राज्य सत्तां ल्यूने लाकातःपिन्त क्षतिपूर्ति बिइगु प्रमुख आधार पूर्ण समानुपातिक समावेशी प्रणाली व प्रत्यक्ष निर्वाचित कार्यकारी हे खः धयादिल । दकले न्हापां देशयात समृद्ध यायेत नि सकल नेपाली जनतां वहस व ज्या न्ह्याकेमाःगु खँय् बः बियादिल ।
ज्याझ्वलय् सकलसित लसकुस संघया नेपालमण्डल समितिका सल्लाहकार चिरिकशोभा ताम्राकारं यानादीगु, ज्याझ्वः संघया महासचिव दिलीप शाहीं न्ह्याकादीगु खः ।
