नेसं ११४५ पोहेलाथ्व २, येँ । कलाकार विभूषण ताम्राकारं सिर्जना यानादिगु कलाकृति सिसी कला प्रदर्शनी वंगु डिसेम्वर ३० निसें न्ह्याःगु दु । नेपाल ललितकला प्रज्ञा प्रतिष्ठानया ग्वसालय् थ्व ब्वज्या जुयाच्वंगु खः ।
ब्वज्याया उलेज्या प्रतिनिधि सभाया उपसभामुख इन्दिरा राणां यानादीगु खः । मय्जु राणां सिसी कलाया क्षेत्रय् ताम्राकारया सिर्जना न्हुगु सोच व ज्वलंयात हाकनं छ्यलेगु सन्देशं सकसित प्रेरणा बिइ धयादीगु दु ।
उलेज्याझ्वलय् नेपाल ललितकला प्रज्ञा प्रतिष्ठानया उपकुलपति लालकाजीलामां प्रतिष्ठानं समाजया फुक्कं तगिंया व्यक्तिपिन्त कःघानाः कलाया विकासय् न्ह्यज्याइगु अभियानया निरन्तरता स्वरूप थ्व ज्याझ्व ग्वसाःग्वःगु कनादिल। प्रतिष्ठान या पूर्व कुलपति के के कर्मचारीं सिसी कलाया क्षेत्रय् विभूषणं सिर्जना याःगु कला पृथक जुगु व थुकिं नेपाली संस्कृतियात क:घागु धारणा तयादिल । प्रतिष्ठानया समसामयिक चित्रकला विभाग प्रमुख सञ्जय बान्तवा राईं फरक क्षेत्रय् कलायात प्रवर्धन यायेगु ताःतुनाः थ्व ज्याझ्वःया ग्वसाःग्वःगु कनादिल। शिल्प हस्तकला विभाग प्रमुख अरुणा हिङ्माङं कला सिर्जनाया क्षेत्र सीमित मजुगु व सितिंवना च्वंगु वस्तुयात नं बांलाःगु रूप बिफैगु उदाहरण प्रदर्शनी बिइगु धारणा तयादिल।
उलेज्याझ्वलय् थीथी संघ संस्थाया प्रतिनिधि कलाकार,पत्रकारतय्सं ब्वति काःगु खः । कलाकार ताम्रकारया पीन्हय्गू कलाकृति ब्वयातःगु थ्व प्रदर्शनी शुक्रबार तक जुइ ।
