नेसं ११४६ चौलागा ९, येँ । नेपालभाषा विषय कयाः अध्ययनरत स्नातक व स्नातकोत्तर तगिंया विद्यार्थीपिन्त लक्षित यानाः शोध प्रवन्धय् उद्धरण व्यवस्थापन प्रशिक्षण ज्याझ्वः जूगु दु । ज्याझ्वलय् प्राज्ञिक लेखनय् पाठ उद्धरण, सन्दर्भ धलः, ग्रन्थ सूची व उद्धरणय् डिजिटलया ग्वाहालि विषयक प्रशिक्षण ब्यूगु खः । थ्व प्रशिक्षण वंगु शुक्रवाः व शनिवाः निन्हुयंकं ह्याउँनिभाः अनुसन्धान केन्द्रया अध्यक्ष अनुप सिं सुवालं बियादीगु खः ।
प्रशिक्षण ज्याझ्वः ३ नं प्रदेशया सभासद् समिता खड्गी श्रेष्ठं पानसय् मत च्याकाः उद्घाटन यायेधुंकाःली न्ह्यज्याःगु खः । ज्याझ्वलय् सांसद खड्गी श्रेष्ठं थुज्वःगु प्रशिक्षणं नेवाः शोधार्थीपिन्त सशक्त याइगुलिसें मिसापिन्त नं शोध क्षेत्रय् न्ह्यज्यायेत हःपाः जुइगु धयादिल ।
ज्याझ्वःया अौचित्य ध्वाथुइकुसें केन्द्रया कोषाध्यक्ष अच्युत रत्न बज्राचार्यं केन्द्रं न्ह्याकाच्वंगु व पितबीत्यंगु थीथी ज्याझ्वःयाबारे नं कनादिल ।
ज्याझ्वलय् लसकुस केन्द्रया दुजः रिेतेश मल्ल व सुभाय् सृष्टि शाक्यं बियादिल । ज्याझ्वः मनरा प्रजापतिं न्ह्याकादीगु खः ।
ज्याझ्वलय् थीथी क्याम्पसया थीथी तगिंया ५० म्ह शोधार्थी विद्यार्थीं ब्वति काःगु खः । ज्याझ्वः ग्वसाः ह्याउँनिभाः अनुसन्धान केन्द्रं ग्वःगु खः ।
