नेसं ११४५ चिल्लाथ्व ५, येँ । नेपाल समाजवादी नेवाः संघया पदाधिकारिपिंसं संघया जिम्मेवारीपाखें मंकाः राजीनामा ब्यूगु दु । थुकथंया राजीनामा उगु संघया केन्द्रीय अध्यक्ष माधव स्यस्यं नेपाल समाजवादी आदिवासी जनजाती महासंघया अध्यक्ष व नेवाः संघया संरक्षक अनुप सिं सुवालयात लःल्हाःगु खः ।
थुकथंया मंकाः त्वःतापौ बीमाःगु कारण वंगु नेपाल समाजवादी पार्टी नयाँ शक्तिया महाधिवेशनय् जूगु चुनावय् स्वनिगः केन्द्रीत छम्ह तकं नेवाः नेतृत्व पार्टीया केन्द्रय् स्थापित यायेमफुगुलिं खः धयातःगु दु । त्वःतापती थःपिंसं मंकाः राजीनामा बियाः न्हूगु नेतृत्वयात अःपुकाबियागु दावी यानातःगु दु । राजीनामा पतिइ च्याम्ह दुजः दूगु केन्द्रीय समितिया न्वकू राकेशमान मास्के, छ्याञ्जेपिं ज्ञानुरत्न महर्जन व किरण तुलाधर दुथ्याः । थःपिनि राजीनामा बिइगु ज्याय् मेपिं केन्द्रीय पदाधिकारिया नं समर्थन दूगु भाजु श्रेष्ठं धयादीगु दु ।
महासंघया अध्यक्ष भाजु सुवालं ३ नम्वर प्रदेशय् भाषा विधेयक पारित याकेत व नयाँ शक्ति पार्टीया सांगठनिक संरचना समानुपातिक समावेशी दयेकेत महत्वपूर्ण भूमीका म्हितूगु थुगु संघया पदाधिकारिपिनि मंकाः राजीनामा दुखद घटना जूगु, थुकिं पहिचानया राजनीतिक पहलय् लिच्वः लाइगु खँय् च्यूताः प्वंकादीगु दु ।
