नेसं ११४५ सिल्लागा १४, येँ । कामपा १२ वडाया वडाअध्यक्ष बालकृष्ण महर्जनं स्नातक तगिमय् नेपालभाषा ब्वनाच्वंम्ह छम्ह विद्यार्थीयात छात्रवृति बिइगु जूगु दु । थुगु छात्रवृतिया दां दँय् १२द्वः तकाया जुइ । थुकथंया छात्रवृति रत्न राज्य लक्ष्मी कलेजय् नेपालभाषा विषय कयाः ब्वनीम्ह विद्यार्थीयात मुक्कं स्नातक तगिंया प्यदँ तकया अध्ययनया लागिं बिइत्यंगु खः ।

रत्न राज्यलक्ष्मी कलेजया स्नातक तगिमय् नेपालभाषा अध्यापन यानाच्वंपिं शिक्षक पुचःया कजि श्रीमिला सुवालया नेतृत्वय् ह्याउँनिभाःया नायः राकेस मान मास्के समेत दुथ्याःगु छगू पुचलं थौं वडा अध्यक्ष महर्जनयात नापलानाः थुगु छात्रवृतिया व्यवस्थापन यानाबियादीत इनाप याःवंगु खः । लिसलय् वय्कः महर्जनं थुगु ज्याय् माःकथंया दां चुलाकेगु बचं बियादीगु खः ।

वडा अध्यक्ष महर्जनया थुगु योगदानं रत्न राज्यलक्ष्मी कलेजय् नेपालभाषा अध्ययन याइपिं विद्यार्थीयात ग्वाहालि जुइ धयातःगु दु । थुकथंया ग्वाहालि बिइगु बचं येँ महानगरपालिकाया मेगु वडा अध्यक्षपिं पाखें नं मौखिककथं वयेधुंकूगु व वय्कःपिन्त नं थुकथं हे नापलानाः छात्रवृति मुनेगु कजि सुवालं कनादीगु दु ।

Leave a Reply

Your email address will not be published. Required fields are marked *