नेसं ११४६ अनलागा ३, हेटौंडा । म्हीगु च्वंगु ३ नं. प्रदेश सभाय् प्रदेश सांसद सदस्य समिता खड्गी श्रेष्ठं प्रदेश सभाय् दोभाषेया व्यवस्था मयाःगु खँय् ध्यानाकर्षण यासें अाक्रोश नं प्वंकादीगु दु । सभाय् दोभाषे मदुगुलिं थम्हं हे थःगु न्वचू निगू भासं नवायेमाःगुलिं समय नं निदुगं माःगु दावी नं यानादिल । भाषा विधेयक छगू पारित जक यानाः छम्ह नायव सुब्बा अनुवादकया व्यवस्था यायेवं राज्यया दायीत्व क्वचाल ला धकाः वय्-कलं न्ह्यसः नं छुनादिल । भाषा विधेयक कार्यान्वयण यायेत प्रदेश सरकारं न्ह्याकेमाःगु अाधारभूत ज्या छाय् मयानागु धकाः न्ह्यसः छुसें वय्-कलं भाषा विधेयक लागू जूगु निदँ दयेधुंकाः तकं विज्ञ परिषद गठन मयासे अलमल छाय् यानातःगु धकाः अाक्रोश प्वंकादिल । वय्-कलं थुकथं अादिवासी नेवाः व तामांगतय्-त अलमल यानाःतःसा विद्रोह यायेत बाध्य जइगु ख्याच्वः नं बियादिल ।
लुमंकेबह जू, ३ नं प्रदेश सभां प्रादेशिक भाषा विधेयक पारित यानाः भाषा दिवस हनाच्वंगु निदँ दयेधुंकूसां प्रदेशय् नेपालभाषा व तामांग भाषा व्यवहारय् सरकारी कामकाजी भाषाकथं छेलाबुलाय् मवःनि ।
