नेसं ११४७ कछलाथ्व ११, येँ । रामेश्वर ह्याउँनिभाःलं च्वःगु सफू “धर्मरत्न यमिया उपन्यासय् नारीपात्र” पितब्यूगु दु । डा. बाबुराम भट्टराइ, प्रा. डा. अोमकारेश्वर, रश्मिला प्रजापति व डा. बज्रमुनि बज्राचार्यं थुगु सफू मंकाःकथं पितब्यूगु खः । सफूया पिकाकः धर्महिरा स्मृति प्रतिष्ठानं ग्वसाः ग्वःगु छगू ज्याझ्वलय् थुकथं सफू पितब्यूगु खः ।

च्वमिं ह्याउँनिभाःजुं थुगु सफू थम्हं स्नातकोत्तर तगिंया शोधपत्रयात रुपान्तर यानागु कनादिल । थुकी वय् कलं धर्मरत्न यमिया लिथु, भृकुटी व आङल्हामु उपन्यासया नारीपात्रया पात्र विधान दुवालागु कनादिल ।

ज्याझ्वलय् पिदंगु सफूया समिक्षा अनुप सिं सुवालं यानादीगु खः । वय् कलं शोधप्रवन्धयात सफूकथं पिथनेबले सफू व शोध प्रबन्धदथुइ पाःगु भेदया चर्चा यानादिल । वय् कलं उपन्यासया नारी चित्रणयात सफूया च्वमिं निर्मम समिक्षा याःगु बाँलाःगु पक्ष जूगु धयादिल । शोध प्रवन्धया रूपय् अापालं प्राविधिक सैद्धान्तिक त्रुति दुसां सफूया रूपय् धाःसा उत्कृष्ट समालोचना यानातःगु खँ कुलादिल ।

नेपालभाषा केन्द्रीय विभागया प्रमुख उपप्रा. डा. बज्राचार्यं सफुती धर्मरत्न यमिया व्यक्तित्व व कृतित्व कुलातःगु खँय् जः ह्वलादिल । साहित्य अध्ययन यायेबले च्वमिया व्यक्तित्व थुइकेमाःगु खँय् बःबियादिल ।

नेवाः देय् दबूया अध्यक्ष रश्मिला प्रजापतिं थुगु सफू ब्वनाः धर्मरत्न यमी म्हसीकेखंगु धयादिल । वय् कलं पूर्ववक्ता अनुप सिं सुवालं धयादीथें नारी पात्रया चर्चा जक मयासे नारीवादी दृष्टिकोणं नं समिक्षा यायेमाःगु खँय् बःबियादिल ।

प्रा. डा. ओमकारेश्वर श्रेष्ठं सफू पात्र विधानया धाःसां पात्र विवरणय् तक्यंगु क्यनादिल । वय् कलं पात्रया विवरण सिबें पात्रया चरित्र चित्रण व परिवेशय्मा नं चर्चा यायेमाःगु खँय् बःबियादिल ।

ज्याझ्वःया मूपाहाँ पूर्वप्रधानमन्त्री बाबुराम भट्टराईं धर्मरत्नया व्यक्तित्वया चर्चा यानादिल । नेपाल बहुधार्मिक, बहुसांस्कृतिक देश जूगुलिं लोकतान्त्रिक व्यवस्थाय् जक नेपालया उन्नति जुइ धयादिल । वय्उ कलं जाति, भाषा, आर्थिक लगायतया विभेद क्वमचायेकं देश विकास जुइमखु धयादिल ।

ज्याझ्वलय लसकुस न्वचू चिरिक शोभा ताम्राकर व सुभाय् न्वचू न्हुछेशोभा तुलाधरं बियादीगु खः । ज्याझ्वःया सभापतित्व तिमिला यमि थापा व ज्याझ्वः मानुषि यमि भट्टराइं न्ह्याकादीगु खः ।





