येँ, काैलागा १४ । नेवाः न्ह्यलुवाः मल्ल के. सुन्दरं नेपाल संवत न्हूदँकथं हनेगु जक मखुसे आन्दोलन खः धैदीगु दु । वय्कलं थथे नेपाल संवत न्हूदँ राष्ट्रिय समारोह समिति ११४४ व नेपाल परम्परागत बौद्धधर्म संघया मंकाः ग्वसालय् ने.सं. ११४४ न्हूदँया लसताय् जूगु ज्याझ्वलय् धैदीगु खः ।
ज्याझ्वलय् पूर्वउपप्रधानमन्त्री प्रकाशमान सिंहं नेपाल संवत नेपाःया मौलिक संवत जूगुलिं थुगु संवतयात सम्मान यायेत सरकारया ध्यानाकर्षण यानादिल । पूर्वप्रधानमन्त्री झलनाथ खनालं नेपाल संवत नेपाःया संवत जुइधुंकाः थुकियात उचित सम्मान यायेमाः धयादिल ।
न्हूदँ समारोह समितिया नायः प्रा.डा. नरेशमान बज्राचार्यया सभापतित्वय् जूगु उगु ज्याझ्वलय् नेपाल परम्परागत बौद्ध धर्म संघया समुद्रमान बज्राचार्यं सुभाय् देछानादीगु खः ।
पूर्वमन्त्री हिसिला यमि, मुक्ति प्रधान, पूर्व रक्षामन्त्री भीमसेन दास प्रधान, विजय सैंजु, येँ महानगरपालिकाया उपप्रमुख सुनिता डंगोल, डा. महेशमान श्रेष्ठ विशेष पाहाँकथं झायादीगु उगु ज्याझ्वलय् येँया थीथी संघसंस्थाया प्रतिनिधिपिंसं ब्वति काःगु खः ।
