नेसं ११४६ कछलागा १२, येँ । नेवाः राजनीतिइ सरोकार क्यंसें नेवाः राजनीतिक सञ्जाल दयेकेत म्हिगः शनिवाः छगू सहलह मुँज्या जुल। मुँज्याय् थीथी राजनीतिक पार्टीया नेतातय्सं ब्वति कयादीगु खः । मुँज्या नेवाः राजनीतिक महागुथिया ग्वसालय् जूगु खः ।
मुँज्याय् महागुथिया दुजः अनुप सिं सुवालं नेवाः राजनीतिक सञ्जाल नीस्वनेत सहलहपौ न्ह्यब्वयादीगु खः । मुँज्याय् नेपाल समाजवादी पार्टी (नयाँ शक्ति)या विज्ञ परिषदया अध्यक्ष हिसिला यमि, क्रान्तिकारी कम्युनिष्ट पार्टीया पोलिटब्युरो दुजः पवनमान श्रेष्ठ, एकीकृत समाजवादी पार्टीया नेता जीवन राम श्रेष्ठ, उज्यालो नेपालया केन्द्रीय समिति सदस्य रामेश्वर श्रेष्ठं नेवाः राजनीतिक सञ्जाल नीस्वनेमाःगु खँय् समर्थन यासें चरणवद्ध खँ ब्याकेमाःगु बिचाः ब्वयादिल । नेतापिंसं नेवाः सरोकारया मुद्दा क्वछिनाः एकवद्ध जुइमाःगु खँय् बः बियादीगु खः ।
सहलह ज्याझ्वलय् जसपा नेपालया दुजः शोभा वज्राचार्य, नेवाः राष्ट्रिय मुक्ति मोर्चाया केन्द्रीय दुजः नमस्ते साय्मि, नेसपा नयाँ शक्तिया दुजः व नेपाल समाजवादी नेवाः संघया उपाध्यक्ष न्हुच्छेशोभा तुलाधर, भाषा वैज्ञानिक प्रा. डा. ओमकारेश्वर श्रेष्ठ, बज्राचार्य अध्ययन मण्डलया अध्यक्ष सानुराजा वज्राचार्य, श्रीजन श्रेष्ठ, प्रसन्द खड्गीं नं नेवाः राजनीतिक सञ्जाल नीस्वनेमाःगु खँय् समर्थन यानादीगु खः ।
मुँज्याय् ब्वतिकयादीपिन्त नेवाः राजनीतिक महागुथिया दुजः दिलिप शाहीं लसकुस यानादीगु खः । मुँज्या महागुथिया कजि माधव स्यस्यं न्ह्याकादीगु खः । मुँज्यां नेवाः राजनीतिक संजाल दयेकेत चरणवद्ध ज्याझ्वः न्ह्याकेगु क्वछ्यूगु धयातःगु दु ।
