नेसं ११४६ थिंलाथ्व १०, येँ । नेपाल ललितकला प्रज्ञा–प्रतिष्ठानया ग्वसालय् व काठमाडौँ महानगरपालिकाया सहकार्यय् थौं ‘नेवाः लोककला अन्तक्रिया तथा यःमरिया द्यःमरि कला कार्यशाला’ जुल । कार्यक्रम प्रतिष्ठानया कुलपति नारदमणि हार्तम्छाली व संस्कृति, पर्यटन तथा नागरिक उड्डयन मन्त्रालयया संस्कृति महाशाखा प्रमुख सहसचिव डा. सुरेश श्रेष्ठं उद्घाटन यानादिल।
ज्याझ्वलय् प्रतिष्ठानया कुलपति नारदमणि हार्तम्छालीं थ्व ज्याझ्वलं पहिचान व कला जागरणया खँ ल्ह्वंगु धयादिल । वय्कलं कार्यशालाय् ब्वतिकाःपिंसं संस्कृतियात कलाया बिम्वीकरण यानाः क्यंगु कला महत्त्वपूर्ण जूगु धारणा तयादिल।
संस्कृति, पर्यटन तथा नागरिक उड्डयन मन्त्रालयया संस्कृति महाशाखा प्रमुख सहसचिव डा. सुरेश सुरस श्रेष्ठं नेपालय् यःमरि थुजाःगु थीथी अभौतिक सांस्कृतिक सम्पदा सुलाच्वंगु व उकियात संरक्षण यायेमाःगुली बःबियादिल ।
प्रतिष्ठानया सदस्य सचिव देवेन्द्रकुमार काफ्ले ‘थुम्केलीं’ नेवाः समुदायया म्हसीका क्वबुयाच्वंगु यःमरीलगायतया लोककलाया संरक्षण, प्रवर्धन व पुस्तान्तरण यायेमाः धयादिल।
प्रतिष्ठानया वास्तुकला तथा लोककला विभाग प्रमुख प्रदीप अधिकारीं लोककला, संस्कृतिया संरक्षण व पुस्तान्तरणया ताःतुनाः थ्व ज्याझ्वःया ग्वसाःग्वःगु कनादिल । वय्कलं लिपा नं थुजाःगु ज्याझ्वः यायेगु धयादिल ।
ज्याझ्वलय् त्रिभुवन विश्वविद्यालय नेपालभाषा केन्द्रीय विभागया सहप्राध्यापक डा.राजनलाल जोशीं ‘यःमरिः कलाकारिताया प्रारम्भ’ विषयक ज्यापौ न्ह्यब्वयादिल । कार्यपत्रय् कलाकार तथा कार्यक्रम संयोजक मनरा प्रजापतिं टिप्पणी यानादिल । कार्यक्रमय् प्रशिक्षण रूपमा सुमन महर्जनं बियादीगु खः । कलाकार सम्झना राजभण्डारीं यःमरि कलाया बारे थःगु अनुभव कनादिल ।
कार्यशालाय् ब्वनेकुथी ब्वंकीपिं नेपालभाषाया ८० म्ह शिक्षकं ब्वति काःगु खः ।
