येँ । वइगु ने.सं. ११४४ कछलाथ्व दशमी, बुधवा: कुन्हु शंखधर दिवस थी थी ज्याझ्व: याना: हनीगु जूगु दु । नेपाल संवत् न्हूदँ राष्ट्रिय समारोह समितिया ग्वसालय् थुगु ज्याझ्व: जुइत्यंगु ख: ।
वकुन्हु सुथय् ७ ता:इलय् लखतिर्थय् छगू ज्याझ्व: तयातःगु दु । कामपा १५ वडा लिसे जानाः शंखधरया बाखनय् स्वाःगु लुँफि काःगु थाय् लखतिर्थय् शंखधर दिवस हनेत्यंगु खः ।
सुथय् ११ ता:इलय् असनय् मुना: सांस्कृतिक बाजागाजासहित प्रज्ञाप्रतिष्ठानय् वनीगु मेगु ज्याझ्व: नं तयातःगु दु । अन प्रधानमन्त्री पुष्पकमल दाहाल प्रचण्डयात सरकारी भ्वँतय् नेपाल संवत् छ्यलेगु निर्णय या:गुलिं सुभाय् देछाय्त्यंगु ख: । थुगु ज्याझ्वः नेपाल संवत न्हूदँ राष्ट्रिय समारोह समिति, नेवाः देय् दबूलिसें थीथी खलः पुचः व जातीय खलः पुचःया मंकाः ग्वसालय् यायेत्यंगु खः । नेपाल सरकारं वंगु कार्तिक २७ गते मन्त्रिपरिषदया बैठकं नेपाल संवतयात सरकारी दस्ताबेजय् छ्यलेगु निर्णय याःगु लसताय् प्रधानमन्त्री प्रचण्डयात थथे सुभाय् देछायेगु ज्याझ्वः तःगु खः ।
न्हिनसिया ३:३० ता:इलय् शंखधर उद्यान, भोताहितिइ नं शंखधर दिवस हनेगु ज्याझ्व: तयात:गु दु ।