नेसं ११४६ चिल्लागा ७, येँ । सुरेश किरण मानन्धर म्हिगः बहनी मन्त । खुसिबुँइ पारिवारिक ज्याझ्वलय् ब्वति कयाच्वंगु इलय् हृदयाघाट जुयाः त्रिवि शिक्षण अस्पताल, मनमोहन कार्डियाक सेन्टर, महाराजगंजय् अस्पताल वंम्ह मानन्धर अनय् मदुगु खः । मानन्धर ५७ दँया वैंसय् मदुगु खः । परिवारया इनापय् वय्क: मदुगु बुखँ थौ न्हिनय्तिनि पितब्यूगु खः । मानन्धरया निम्ह काय् व जहान दी ।
मदुम्ह मानन्धर नेपालभाषा सञ्चार ख्यलय् प्यंगू दशकन्ह्यवंनिसें सक्रियम्ह खः । इनाप पत्रिकांनिसें नेपालभाषा सञ्चार ख्यलय् सक्रियम्ह थ्वय्कः विश्वभूमि न्हिंपौया स्थापनाकालंनिसें नेपालभाषा टाइम्स न्हिंपौया प्रकाशनतक संवावददातांनिसें सम्पादकया भूमिकातक निर्वाह यानादीगु खः । वय्कःया सम्पादनय् विश्वभूमि, सन्ध्या टाइम्स व नेपालभाषा न्हिपौ प्रकाशन जूगु दु । लिसें वय्कलं आपालं सफू, जीवनी, पत्र पत्रिका, रेडियो व टेलिभिजन समाचारया नं सम्पादन यानादीगु दु । मदुम्ह मानन्धर आधुनिक कवि नं खः । वय्कलंनेपालभाषा कविता साहित्ययात न्हूगु दिशाय् ब्यूगु तायेकातःगु दु । मदुम्ह मानन्धरं मह सञ्चारया लागिं स्क्रिप्ट च्वयेगुनिसें नेपालभाषाया ख्यालः नाटक नं च्वयादीगु दु । मदुम्ह मानन्धर नेवाः राजनीति ख्यलय् नं सक्रिय जुयादी । लिपांगु इलय् वय्कः भाषा आयोगया दुजः जुयादी । वय्कः थीथी राष्ट्रिय पुरस्कारं सुशोभित व्यक्तित्व खः ।
मदुम्ह मानन्धरया अन्तिम संस्कार कन्हय् बुधवाः येँया ल्हुतिइ याइगु जूगु दु । थ्वसिबेंन्ह्यः अन्तिम श्रद्धाञ्जलिया नितिं कन्हय् बुधवाः सुथय् ९ ता इलंनिसें १२ ता ईतक नेपालभाषा मंकाः खलःया मंकाःछेँ बिजेश्वरीइ वय्कःया पार्थिव शरीरयात तइगु जूगु दु । अन्तिम श्रद्धाञ्जलि देछायेधुंकाः वय्कःया सिथं बिजेश्वरीनिसें धल्को, क्षेत्रपाति, थाय्मदु, किलाघः जुयाः ल्हुतिया कर्णदीपय् अन्तिम संस्कार याइगु जूगु दु ।
